Шаҳрам Ғиёсовнинг навбатдаги жанги муддати аниқ бўлди

Профессионал бокснинг ярим ўрта (-66,68 кг) ва супер енгил (-63,5 кг) вазнларида рингга чиқаётган Шаҳрам Ғиёсовнинг олтинчи жанги муддати аниқ бўлди.

Унга кўра, ўзбекистонлик боксчи 24 ноябрь куни АҚШда, Атлантик Сити шаҳридаги “Mark G. Etess Arena“ саройида бўлиб ўтадиган бокс кечасида рингга кўтарилади. Шу куни бошқа бир ўзбекистонлик боксчи Муроджон Аҳмадалиев ҳам ўзининг WBA International камарини ҳимоя қилади.

Кечанинг асосий жангида эса ярим оғир вазн (-79,38 кг) тоифасининг WBA йўналиши чемпиони, россиялик Дмитрий Бивол канадалик Жон Паскалга қарши ўз камарини ҳимоя қилади.

Ҳозирча Шаҳрамнинг рақиби ким бўлиши номаълум. Бу борада спортчи ўзининг ижтимоий тармоқлардаги саҳифасида тез орада хабар беришини маълум қилган.

Эслатиб ўтамиз, Шаҳрам Ғиёсов профессионал боксда 5 та жанг (уларнинг биттаси супер енгил, қолгани ярим ўрта вазн тоифасида ўтказилган) ўтказиб, уларнинг барчасида ғалаба қозонган. 4 та жангда рақибларини нокаутга учратган. Сўнгги жангини у Лондондаги “Уэмбли“ стадионида ўтказиб, Хулио Лагунани нокаут эвазига мағлубиятга учратганди.

Айни вақтда Шаҳрам Ғиёсов супер енгил вазн тоифасининг WBA йўналиши рейтингида 14-ўринда бормоқда.