Севастополда Су-27 самолётини Россиянинг ўзи уриб туширган — ОАВ
Қрим ярим оролидаги Севастополь шаҳри осмонида Су-27 қирувчиси хатолик туфайли Россия ҳаво ҳужумига қарши мудофаа тизими томонидан уриб туширилган. Бу ҳақда айрим Телеграм-каналлар хабар бермоқда. Ҳодиса тизим ишидаги носозлик сабабли юз берган. Учувчи катапульта қилиб, омон қолган.
Таъкидланишича, ўзини-ўзи отиб қўйиш натижасида самолёт қўлдан бой берилгани фактини босди-босди қилиш учун воқеа юзасидан бир нечта версияларни тарқатиш буюрилган. Хусусан, самолёт украиналиклар томонидан уриб туширилгани ва техник носозлик ҳақидаги версиялар ОАВларда пайдо бўлган. Аммо ҳалокатдан бир соат ўтиб, ҳарбий-космик кучлар офицерларидан бир нечтаси қўлга олинган.
Нашр эслатишича, бундай ҳолат биринчи марта юз бериши эмас. Россия ўзининг ҳаво ҳужумига қарши мудофаа тизими туфайли бир нечта самолётларини йўқотган.