Сенат раиси Кореяда ўзбекистонлик ёшлар билан учрашув ўтказди

Олий Мажлис делегацияси аъзолари Сеулда Ўзбекистоннинг таълим олаётган ва ишлаётган ёшлари билан ҳам учрашди. Учрашувда мамлакатимизни янада ривожлантириш юзасидан фикр алмашилди, ёшларнинг Ўзбекистондаги ислоҳотлар ва янгиланиш жараёнида фаол иштирок этиши ҳақида сўз юритилди, деб хабар бермоқда Ўзбекистон Республикаси Олий Мажлиси Сенатининг Ахборот хизмати.

Учрашув очиқ мулоқот руҳида ўтди, ҳар бир иштирокчи нафақат ўз фикри билан ўртоқлашиш, балки ўзини қизиқтирган саволини Ўзбекистон Республикаси Олий Мажлиси Сенати Раисига бериш имконига эга бўлди.

Учрашув якунида парламент аъзолари таъкидлаганидек, ёшлар билан доимий мулоқотда бўлиш, уларнинг манфаатларини эътиборга олиш ҳамда билимли ва ижодкор ёшларни ҳар томонлама қўллаб-қувватлаш мамлакатимизда олиб борилаётган ёшларга доир давлат сиёсатининг мақсадларидан биридир.

Шунинг билан Ўзбекистон парламенти делегациясининг Корея Республикасига ташрифи якунланди.