Россиядан гипертовушли ракета синови: "Нишон муваффақиятли урилди"

Кеча Россия ўзининг "Зиркон" гипертовушли ракетасини муваффақиятли синовдан ўтказганини эълон қилди.

Мудофаа вазирлиги томонидан берилган баёнотда, охирги икки ҳафта ичида ўтказилган иккинчи синовда ракетанинг Оқ денгиздаги Адмирал Горшков жанговар кемасидан отилгани ва 400 км узоқликдаги нишонни урганлиги таъкидланди.

Россия президенти Владимир Путин аввалроқ Зирконни ўз мамлакатининг янги авлод "бетакрор" қурол тизимларининг бир қисми деб таърифлаган.

Товушдан 5 баробар тезроқ ҳаракатланадиган Зиркон соатига тахминан 6200 километр тезликда ҳаракатлана олади ва 400 килограмм оғирликдаги жанговар каллакни олиб юради.

Вазирлик томонидан эълон қилинган қисқа видеода ракета тунги осмонни нур чақнаши билан ёритганини кўриш мумкин.

Яқинда АҚШ, Россия ва Хитой каби давлатлар гипертовушли ракета синовларини ўтказганликларини эълон қилишди.