"Реал"га қарши баҳсда "Манчестер Сити"га нима етишмади?
“Барселона”даги пайтида Пеп Гвардиола энг кўп риск қиладиган мураббий эди. Шунинг учун ўша жамоа ёрқинроқ кўринади, алоҳида ўйинларни эслаш керак бўлса,жуда кўп – “Арсенал” билан, “Милан”, “Реал”, “МЮ” билан...
Ҳозирги “Манчестер Сити” кучлироқ бўлиши мумкин, соврин борасида ҳам қолишмайди, лекин кўз олдимизга келтирганимизда, асосан, давравий турнирларда “ошини олдириб қўймайдиган”, барқарор жамоа тасаввури пайдо бўлда. Етти йиллик даврда яққол эсланадиган алоҳида ўйинлар йўқдек.
Чемпионлар Лигасидаги қаторасига омадсиз ўйинлар балким Гвардиолани мураббий сифатида ўзгартиргандир, жамоа кучлими, демак ҳаммаси назорат остида бўлгани дуруст, таҳлика қўшилганида кучлар яқинлашиб қолади, деб хулоса қилгандир. Балким бу ечим якунда “Манчестер Сити”га кўпроқ соврин олиб келган, балким ўтган йилги треблнинг асоси ҳам мана шу қараш бўлгандир. Ким билади...
Аммо назоратга интилиш даражаси шу даражага етдики, ушбу мавсумда “Манчестер Сити” асосий рақиблари билан ўйинларда ҳам ютқазмасликни ютишдан устун қўйишни бошлади. Ҳа, жамоа жуда кам ютқазди, топ ўйинларда фақат “Арсенал” сўнгги дақиқаларда ғалабани илиб кетди, лекин ғалаба ҳам йўқ – жуда кўп катта муҳим ўйинлар дуранг билан якунланди. Бу дуранглар оқибатда Гвардиолага навбатдаги чемпионликни олиб келиш эҳтимоли юқори, тўғри, лекин Чемпионлар Лигасида алоҳида ўйинларни ютмасдан туриб финалга чиқиб бўлмайди, бу ҳам бор.
Кўпинча, ҳимояланган жамоани қўрқоқ дейишади. Аслида гап бунда эмас, аслида ўз имкониятларидан тўлиқ фойдалана олмаган, бор имкониятини майдонга ташлай олмаган тараф қўрқоқдир.
Кеча манчестерликлар “Реал”дан яққол устунлик қилишди, ўттиздан ортиқ дарвозага зарба берилди, ўйин вақтининг катта қисми “Манчестер Сити”нинг назоратида кечди. Лекин “Реал” билан назорат етарли эмас, риск ҳам керак. Шунча устунлик ва вазиятлар бўлганида, рискни гапириш нима фойда, асосий масала вазиятлардан фойдалана олмаслик, дейиш мумкиндир ҳам, лекин риск қила олиш кўникмаси, керакли пайтда, кутилмаган пайтда ўша дриблингни амалга ошириш, ўша зарбани ижро қилиш, ўша ғалати финт ҳаммасини ҳал қилади.
Дарвозага берилган 33 зарбадан қайси бирини «ваҳ, мана бу аниқ гол бўлиши керак эди?» деб эслай оласиз? Агар эслай олмасангиз, «Сити» ғалаба учун ҳаммасини қилди, дейиш қанчалик тўғри?
“Манчестер Сити”нинг кечаги устунлиги ҳар қанча бўлмасин, эҳтиёткор эди, рисксиз эди, рақибни эсанкиратадиган, мувозанатдан чиқарадиган даражада эмасди, айтганимдек, кутилмаган қарорлар етишмади.
Оқибатда энг муҳим паллада энг катта риск – пеналтилар сериясида жазоланишди.
