Қарши туманида ҳашар йўли билан қурилган кўприк қулаб тушди. Ҳокимлик кўприк таъмирланаётганини маълум қилди

Қашқадарё вилоятининг Қарши туманида аҳоли томонидан ҳашар йўли билан қурилган кўприк қулаб тушгач, замонавий, аҳоли учун қулай ҳолатга келтириладиган бўлди. Бу ҳақда “Дарё”га туман ҳокимлиги ахборот хизмати раҳбари Тўлқин Турдиев хабар берди.

Билдирилишича, туманнинг “Шодлик” маҳалласи Қумбойғунди қишлоғидаги кўприк айни кунларда таъмирталаб аҳволга келиб қолган.

Республикамизда амалга оширилаётган ислоҳотларга ҳамоҳанг тарзда Қарши туманида ҳам аҳолига муносиб турмуш шароитларини яратиш мақсадидаги амалий ишлар давом этмоқда. Жорий йилда ҳам кўплаб хайрли амаллар ҳашар йўли орқали бажарилиб, аҳолининг оғири енгиллаштирилмоқда. Хусусан, “Шодлик” маҳалласи Қумбойғунди қишлоғидаги 1970 йилларда қурилган кўприк умуман таъмирланмаган эди.

Шу боис қишлоқ аҳли туман ҳокимига мурожаат билан чиқди. Мурожаат ортидан зудлик билан кўрилган чоралар натижасида, мазкур кўприкни қайта қуриш ишлари бошлаб юборилди. Тезда кўрилган чоралардан қишлоқ аҳли беҳад хурсанд, — дейди Тўлқин Турдиев.

Қўшимча қилинишича, ушбу кўприк қурилгач, атрофига муҳофаза панжаралари ҳам ўрнатилади.

Қишлоғимиздаги кўприк етмишинчи йилларда қурилган, ўтиб-қайтиш хавфли эди. Қишлоқ аҳли қатнови учун жуда зарурий ушбу кўприк, мана бақувват, хавфсиз ва қулай кўринишга келтириляпти. Президентимизга ҳамда вилоят раҳбаримизга эътибор учун, бизнинг мурожаатимиз ижобий ҳал этилгани учун қишлоқ аҳли номидан ўз миннатдорлигимизни билдирамиз, — дейди қишлоқ фуқароси Норбой бобо.

Эслатиб ўтамиз, 2020 йил Қашқадарёга ташриф билан борган Шавкат Мирзиёев президентга хат ёзаётган қашқадарёликларнинг аксарияти кўприклар қуриб беришни сўраганини айтганди.

Қишлоқда яшаётган одамлар розими? Менга келган хатларнинг кўпида ‘кўприк қуриб беринг, президент бува’ деб ёзишган, — дея таъкидлаган Шавкат Мирзиёев масъулларга мурожаат қиларкан.