Оқ уй: Байден БМТ Хавфсизлик кенгашини ислоҳ қилиш истагини тасдиқлайди

АҚШ Президенти Жозеф Байден БМТ Бош Ассамблеясининг 78-сессиясидаги нутқида Вашингтоннинг Хавфсизлик кенгашини кенгайтириш истагини тасдиқлайди.

Бу ҳақда Оқ уй Миллий хавфсизлик кенгашининг стратегик коммуникациялар бўйича координатори Жон Кирби маълум қилди.

"Биз Хавфсизлик Кенгаши архитектурасини кўриб чиқиш вақти келганини аниқ айтдик. Биз у кўпроқ қамраб олиши керак деб ҳисоблаймиз", - деди Кирби.

Унинг қайд этишича, Байден шу ҳафтада БМТ Хавфсизлик Кенгашининг кенгайтирилишини қўллаб-қувватлайди.

Ҳозирда БМТ Хавфсизлик Кенгашининг бешта доимий аъзоси: Россия, Буюк Британия, Хитой, АҚШ ва Франция. Ушбу мамлакатларнинг ҳар бири кенгашда вето ҳуқуқига эга. Географик асосда танланган 10 та аъзо давлат доимий бўлмаган аъзолар мақомига эга.

Эслатиб ўтамиз, аввалроқ Туркия президенти Ражаб Тоййиб Эрдўғон БМТ Хавфсизлик кенгаши сафларини кенгайтириш таклифини билдирган эди. У "дунё бешдан катта" деган. Шу билан бирга, бошқа давлатлар раҳбарлари ҳам бу таклифни қўллаб-қувватлади.