Миср сув танқислигига дуч келиши мумкин, сабаби Эфиопия қураётган тўғон
Миср Эфиопиядаги «Уйғониш» тўғони атрофида содир бўлаётган воқеалар сабаб БМТ Хавфсизлик кенгашига мактуб йўллади.
«Миср ташқи ишлар вазири Бадр Абдулати 1 сентябр куни Эфиопия бош вазирининг «Уйғониш» тўғонини тўлдиришнинг бешинчи босқичи ҳақидаги баёнотидан кейин БМТ Хавфсизлик кенгаши раисига мактуб йўллади», — дейилади хабарда.
Абдулати ўз мактубида Миср Эфиопиянинг тўғон масаласи бўйича сиёсатини қатъий қоралашини, мамлакат 2015 йилда Миср, Судан ва Эфиопия ўртасида имзоланган халқаро ҳуқуқ ҳамда битим тамойилларини бузаётганини маълум қилган.
Таъкидланишича, сўнгги йилларда Нил дарёсида сув сатҳининг ортиши ва катта саъй-ҳаракатларга қарамай, Эфиопиянинг ноқонуний сиёсати Миср ва Судан учун хавфли салбий оқибатларга олиб келиши мумкин.
Эфиопия 2012 йилдан бери Нилда тўғон қуриш бўйича кенг кўламли лойиҳани амалга ошириб келмоқда. Экспертларнинг фикрича, унинг ишга туширилиши Судан ва Мисрда сув танқислигини юзага келтиради.
2020 йилнинг ёзига келиб, Эфиопия энергетиклари Кўк Нил дарёсида «Ҳидасе» гидроэлектр станцияси қурилишининг асосий босқичини якунлаган эди. У Африка қитъасидаги энг каттаси, жаҳонда еттинчи ўриндаги бўлади, бу ГЭС Эфиопияни иқтисодий ривожланишнинг янги босқичига олиб чиқиши, бироқ мамлакатнинг кутилаётган гуркираши, дарёнинг қуйи оқимида яшовчи 160 миллион киши учун улкан муаммолар яратиши ҳам мумкинлиги айтилганди.
«Ҳидасе» ГЭСнинг баландлиги 560 метр, кенглиги 1700 метр бўлган тўғон Эфиопиянинг энг ғарбий қисмида Судан чегарасига 7 километр етмасдан Кўк Нилнинг сувини тўсган. Тўғондан 800 километр қуйи қисмида Кўк Нил Оқ Нил билан қўшилади ва у ерда Судан пойтахти Хартум жойлашган.
