Microsoft қозоқ тилини ўзининг расмий тиллари рўйхатига киритди
Microsoft компанияси Microsoft Translator тиллар гуруҳига қозоқ тилининг киритилганини маълум қилди. Ҳозирда компаниянинг таржима қилинадиган тиллари гуруҳига 60 дан ортиқ тил киради, деб хабар беради Kaz-science.kz.
Эндиликда қозоқ тили – Microsoft таржима дастурлари, иловалари, Office дастурлари, Bing таржимони ҳамда бизнес ва дастурий таъминотни ишлаб чиқувчиларга мўлжалланган Azure Cognitive Services таржима хизматининг тилидир.
«Бугун биз тил тўсиқларини олиб ташлаш бўйича вазифамизни давом эттириб, Microsoft Translator тиллар гуруҳига қозоқ тилини киритганимизни мамнуният билан маълум қиламиз. Qazaqsha ёки Qazaq Tili дея танилган ушбу тилда Қозоғистонда, Ғарбий Хитойда, Ғарбий Мўғулистонда, Россиянинг жанубида ва дунёнинг бошқа қисмларида 22 миллионга яқин одам сўзлашади», - дейилади баёнотда.
Эслатиб ўтамиз, 2014 йил 12 декабрь куни WikiBilim жамоат фонди Google компанияси таржима хизматига қозоқ тили киритилганини расман эълон қилганди.
Бугунги кунда қозоқ тили бу таржима воситасидаги 109 та тилдан биридир.
