Мбаппенинг Евро-2024да ўйини чиқмаётганининг 3та сабаби айтилди
Франция миллий жамоаси ҳужумчиси Килиан Мбаппенинг Европа чемпионатидаги иштироки кутилган даражада чиқмаётганининг сабаблари маълум қилинди.
Le Parisien нашри бунга 3та сабабни келтирган. Булар – турнирдаги жароҳати, «ПСЖ» билан можаро ва сиёсат.
Турнирда Австрияга қарши биринчи ўйинида бурнини синдириб олган форвард жами 4 ўйинда бор йўғи битта гол урди – Полша дарвозасига пеналтидан тўп киритди.
«Биринчидан, Мбаппе Еврода идеал спорт формасида эмас. У бурни сингани учун ниқобда тўп сураётганига қарамай, Килианни бели ва тиззасидаги оғриқлар безовта қилмоқда. У июн ойида Люксембург билан баҳсда тиззасидан жароҳат олганди.
Иккинчидан, Мбаппега «ПСЖ» билан можароли вазият ҳам ёмон таъсир қилди. Килиан шартномасини узайтирмагани ва «Реал»га эркин агент сифатида ўтгани учун у Париж клуби билан келишмовчиликлар фонида хайрлашди.
Учинчидан, Франциядаги сиёсий вазият ҳам уни чалғитмоқда. Парламент сайловларининг биринчи турида Марин Ле Пен бошчилигидаги «Миллий бирлашув» партияси ғалаба қозонганини Мбаппе «фожиа» деб атаган», - дейилади нашр хабарида.
Маълумот учун, Франция Евро-2024 яримфиналида 9 июл куни Испанияга қарши майдонга тушади.