Боксчилар Баҳодир ва Камшибек жанги Бокуда бўлмайди

Озарбайжоннинг Боку шаҳрида бокс бўйича «Буюк ипак йўли» халқаро турнирида рингга кўтарилган 10 нафар боксчимиздан 9 нафари баҳсларда ғалаба қозонди. Фақатгина 63,5 кг. вазн тоифасида Асадбек Ражабов мағлубият аламини тотди.

Жаҳон ва Олимпиада чемпиони Баҳодир Жалолов +92 вазнда эронлик Рузбеҳ Сафарига қарши жанг қилиб 5:0 ҳисобида ғалаба қозонди ва 1/2 финалга йўл олди.

Дарвоқе, ярим финал доирасида бокс мухлислари ва мутахассислари Баҳодир Жалолов ҳамда Камшибек Кункабаев ўртасида жанг бўлишини кутаётган эди. Бироқ, Камшибек 1/4 финал жангида россиялик Рамазан Карнукаевга кутилмаганда имкониятни бой бериб қўйди ва мусобақани тарк этди. Шу тариқа Баҳодир ҳамда Камшибек жанги бошқа мусобақаларга қолди.