"Барса"нинг фаол старти, баҳсли вазиятлар ва эл-класико учун туғилган Жуд Беллингем

Испания Ла Лигаси 32-турида "Реал" ўз майдонида "Барселона"на қабул қилиб, навбатдаги камбэкни амалга оширди.

"Реал Мадрид" ва "Барселона" ўртасидаги ўйин аввалига Испания чемпионатининг ушбу мавсумидаги интрига учун сўнгги имконият деб қаралди. Тўғри, каталонияликларга фақат ғалаба қозониш керак эди. Шунга қарамай, Хави ҳужумкорроқ бўлган Педрини эмас, балки ярим ҳимояда Кристенсен билан бироз тартиблироқ таркибни танлади. "Реал" эса аксинча анча дадил кўринди. Ҳимоя чизиғи (Камавинга, Рюдигер, Тчуамени, Васкес) ярим ҳимоячилар билан тўлдирилди. Кўриниб турибдики, шунинг учун ҳам жорий мавсумни ярмини захира ўриндиғида бошлаган Модрич учун бу ўйинда майдон марказида жой бор эди.

Учрашув меҳмонларнинг тезкор голи билан бошланди. Рафинья бурчакдан жамоадошига аниқ тўп оширди ва Кристенсен боши билан гол урди. Бу ерда хато кимда эканлигини аниқлаш қийин: тўпга чиқишда Луниннинг хатосими ёки Крооснинг пассивлиги. Балким Кристеннинг маҳоратидир.

Умуман олганда, "Барса" рақиб жарима майдончасига кириб келганида "қироллик клуби" футболчилари енгил "мондараж"ни ҳис қилиб туришди. Ҳимоячиларнинг мияси сонияларга ўчиб қолаётганга ўхшарди. Умуман олганда, бу ҳозирги "Реал Мадрид"нинг ягона заиф нуқтасидир. Айниқса, Ла Лига жорий мавсумидаги ягона мағлубиятни ҳисобга олсак "Атлетико" ҳамшаҳарлагиа учта бош билан голи уриб кетганди.

Бироқ, "Реал Мадрид" гол уриш учун рақибидан яхшироқ бўлиши шарт эмас. Лукас Васкес кеча ўзининг энг яхши ўйинларидан бирини ўтказди. У рақиб жарима майдончаси ичида аввалига Канселуни, кейин эса Кубарсини ортда қолдирди. Бошқа югуришнинг ҳожати йўқ эди, чунки каталонияликларнинг 17 ёшли ҳимоячиси унга қўполлик ишлатганди. Ҳакам пенальти белгилади. Тўп ёнига яқинлашган Винисиус хотиржамлик билан уни голга айлантирди - 1:1. Каталонияликларнинг муаммолари шу билан тугамади. Танаффус олдидан жамоа етакчиларидан бири Френки Де Йонг жароҳат олди. Ҳа, яна.

Иккинчи бўлимда "Барселона" кўплаб ўзгаришларни амалга оширди. Қайсидир паллада алмаштиришлар бўйича ҳисоб 4:0 бўлди. “Барса” сафида Феликс ва Торрес майдонга тушди, шунингдек, кейинчалик майдонга тушган Фермин ҳам гол урди. Ушбу голда меҳмонлардан бири офсайдда қолгандек туюлди, аммо такрорий лавҳа гол тўғри ҳисобланганини кўрсатди. “Барселона” яна олдинга чиқиб олди.

Бироқ бу сафар "Реал" биринчи бўлимдагидан ҳам тезроқ жавоб қайтарди. Орадан тўрт дақиқа ўтиб Винисиуснинг узатмасини Лукас Васкес дарвозага жойлаб қўйди. Мезбонлар шу қадар тезкор комбинацияга эга бўлишдики, рақибларнинг ҳеч бири ҳатто тўп учун курашишга ҳам улгурмади.

Агар ўйин охирида ғалабага ким яқин эди деб сўрасангиз, бу "Реал". Бир вазиятда Винисиус бирга-бир вазиятдан фойдалана олмади. "Барса" посбони жамоасини муқаррар голдан қутқарди. Аммо Беллингем ўз имкониятини қўлдан бой бермади. 90+1-дақиқада у яна "қироллик клуби"га ғалаба келтирувчи голни киритди. Қолаверса, голли узатмани асосий таркибда камдан-кам ўйнайдиган Васкес амалга оширди. Биринчи даврадаги класикода ҳам Жуд қўшиб берилган дақиқаларда ғалаба голини уриб кетганди. Одам ўйланиб қолади, Жуд эл-класико учун туғилганми ўзи?

Ўйин 30-дақиқасида баҳсли вазият юзага келди. Бурчак зарбасидан сўнг Ямал тўпни дарвозага буриб юборди. Лунин биринчи уринишда тўпни қайтара эгаллай олмади, кейин эса ушлаб олди. "Барса" футболчилари дарвозабон тўпни дарвоза ичидан қайтарганини айтиб ҳакамга юзланди. ВАР билан узоқ маслаҳатлашган бош ҳакам гол йўқ деб топди. Аммо шуниси аниқ эдики тақдим этилган такрорий лавҳаларнинг бирортаси тўп аниқ чизиқни кесиб ўтганини кўрсатиб бера олмади.

Шунчаки, Ла Лига каби катта миллионлаб кузатувчиларига эга чемпионат голни аниқлаш тизимидан воз кечгани бугун уларнинг зарарига ишлади. Лига президенти Тебас бу тизим учун йилига 3 миллион сарфлашни хоҳламаган экан. Ана энди миллионлаб танқидлар у томон отилади.