Барак Обаманинг қизлари полицияга қарши уюштирилган намойишда қатнашишди
Американинг 44-президенти Барак Обаманинг қизлари афроамерикалик Жорж Флойд вафотидан кейин АҚШда Black Lives Matter ҳаракати томонидан уюштирилган норозилик намойишларида қатнашди. Бу ҳақда Обама 8 июнь, сешанба куни эфирга узатилган CNN телеканалига берган интервьюсида айтиб ўтди.
Суҳбат чоғида Оқ Уйнинг собиқ раҳбари қизлари Саша ва Малиянинг жисмоний хавфсизлиги тўғрисида доимо ташвишланаётганини айтди. Обаманинг сўзларига кўра, қизлар "яхши ва ёмонни нозик ҳис қилишади".
Собиқ президент, унинг қизлари ва уларнинг кўплаб тенгдошлари "нафақат шов-шув кўтаришдан", балки "тизимни ўзгартиришдан" манфаатдор эканлигига амин.
Маълумот учун, 2020 йил 25 майда Флойд полиция томонидан кескин тарзда ҳибсга олингандан сўнг Миннеаполис шаҳрида реанимацияда вафот этди. У офицерларга нафас ололмаётганидан шикоят қилди. Бир кишининг ўлими нафақат Қўшма Штатларда, балки Европада ҳам оммавий норозилик ва тартибсизликларни келтириб чиқарганди.
