АПЛнинг ВАРсиз жадвали эълон қилинди
Агарда Англия Премьер-лигасида VAR тизими жорий қилинмаганида, ҳозир бошқачароқ жадвал гувоҳига айланган бўлардик. Биз бугун 2023/24 йилги мавсумда VAR томонидан аралашилган вазиятлар, шу сабаб урилган ёки бекор қилинган голлар ва очколарни ҳисоблаб чиқдик. Шу орқали шакллантирган жадвалимиз эса бироз бошқачароқ кўринишга эга бўлди. Унга кўра, "Манчестер Юнайтед" еврокубокларга йўлланма берадиган ўринларда бўлмайди. "Тоттенхэм Хотспур" эса икки очколик фарқ билан турнир жадвали етакчисига айланади.
Агарда VAR бўлмаганида, "Тоттенхэм" "Арсенал" ва "Брентфорд"га қарши ўйинларни ютиб олган бўларди. Негаки, ана шу баҳсларда видео ассистент рефери тизими орқали рақибларга пенальти олиб берилди. Оқибатда, жами 4 очко йўқотилди.
"МЮ"нинг ҳозирда қайд этиб турган 5 та мағлубияти ва 7 та ғалабаси ўзгаришсиз қолади.
"Брайтон" эса "Эвертон" билан 1-1 тугаган ўйинда ғалабага эришган бўларди. Шу орқали "чағалайлар" "МЮ" ва "Ньюкасл"ни ортда қолдириб, кучли олтиликка кирарди. Бу эса ўз навбатида, турнир жадвалининг умумий қиёфасига бир қадар таъсир қилади.
Янги мавсумнинг ўн икки ҳафтаси давомида VAR жами 26 та вазиятга аралашди. Улар ичида 11 та бекор қилинган голлар ва 7 та пенальти белгиланишлари бор. Олиб берилган пенальтиларнинг барини голга айлантирилганини ҳам алоҳида таъкидлаш жоиз. Умумий олганда, VAR қарорларидан энг кўп фойда кўрга бу "Ноттингем Форест"дир. Стив Купер жамоаси фойдасига уч бор VAR қарор қабул қилган. Шулардан иккитаси дуранг баҳсда, биттаси "Ливерпул"га мағлубиятда юз берган.
"Арсенал" ва "Челси" фойдасига 3 та қарор чиқарилган ва шунча вазият уларга қарши ишлаган. Хусусан, Микель Артета жамоаси VAR'сиз ҳозиргидан кўра бир очко кўпроқ йиғган бўларди.
Шунингдек, "Бёрнли", "Ливерпуль", "МЮ" ва "Тоттенхэм" ҳам уч бор VAR қарорларидан азият чекканлар қаторидадир.
Агарда "Манчестер Юнайтед"нинг ҳолатига эътибор берсак, VAR жамоанинг очколарини ўзгартирмагани, фақатгина голлар нисбатига бироз таъсир кўрсатганини билиб олиш мумкин. "Арсенал" билан ўйинда VAR сабаб Гарначонинг голи бекор қилинади. Шунингдек, Энтони Тейлор Хаверцга қўполлик ишлатилганда қўйган пенальтиси ҳам шу тизим сабабли йўққа чиққанди.
Жадвал пастроғига эътибор берсак, деярли ўзгаришни кўрмаймиз. Тўққизинчи ўриндаги "Вест Хэм"дан то 18 ўриндаги "Лутон Таун"га қадар ҳамма клуб ҳақиқий ўрнида қолган. Фақатгина "Бёрнли" ва "Шеффилд Юнайтед"лар жой алмашиб олади. Шуни алоҳида таъкидлаш жоизки, ҳозирга қадар "Лутон Таун", "Вест Хэм" ва "Вулверхэмптон" клублари бирор марта VAR`дан зарар ёки фойда кўргани йўқ.
