Yaponiya yadro qurolini boshqarishda sun’iy intellektdan foydalanishga qarshi

Yaponiya hukumati sun’iy intellekt yadro quroli bilan bog‘liq tizimda qo‘llanishiga qarshi chiqmoqda. Tashqi ishlar vaziri Yoko Kamikava bugun BMT Xavfsizlik kengashida “Yadroviy qurolsizlanish va yadro qurolini tarqatmaslik” mavzusida bo‘lib o‘tadigan ochiq bahs-munozarada ma’ruza qilib, ishtirokchilarga shu haqda eslatmoqchi, deb xabar tarqatdi “Yomiuri” gazetasi.

Vazir yadro qurolini boshqarish va saqlashda faqat inson ishtirok etishi zarurligini ta’kidlash niyatida. Kamikava davlatlarni ommaviy qirg‘in qurolini koinotga joylashtirmaslik to‘g‘risidagi xalqaro shartnomaga og‘ishmay amal qilishga ham chaqiradi.

Yaponiya almashuv asosida BMT Xavfsizlik kengashida raislik vazifasini bajaryapti. Bugunga belgilangan yadro quroli masalasiga bag‘ishlangan yig‘ilishga ham aynan Yoko Kamikava raislik qiladi.