DW: Yevrokomissiya Ukrainadagi chaqiriq yoshidagi erkaklarni himoyadan mahrum etish rejasini na tasdiqladi, na inkor etdi

Bryusselda bo‘lib o‘tgan brifingda Yevrokomissiyaning rasmiy vakili Markus Lammert bu haqdagi xabarlarga javoban Ukrainani qo‘llab-quvvatlash "qat’iy" bo‘lib qolayotganini ta’kidladi va Yevropa Ittifoqi "Vaqtinchalik himoya ko‘rsatmasi" (TPD) doirasida taxminan 4 million ukrainalikka boshpana berganini eslatib o‘tdi.

Hozirgi himoya rejimi 2027 yilning martigacha amal qiladi, uning muddati tugaganidan keyin ko‘riladigan choralar esa hozir Yevrokomissiya tomonidan YEI davlatlari bilan muhokama qilinmoqda. Shu bilan birga, Lammert hozirgi bosqichda hech qanday aniq reja yoki takliflar haqida ma’lumot bera olmasligini bildirdi.

Avvalroq Euractiv nashri Ukrainadagi harbiy xizmatga majbur erkaklarni himoya sxemasidan chiqarib tashlash imkoniyati haqida yozgan edi.

Jurnalistlar tanishgan Yevropa Ittifoqi Kengashining ichki hujjatiga ko‘ra, muhokama qilinayotgan muqobillar orasida vaqtinchalik himoyani uning qo‘llanish doirasini qisqartirgan holda (xususan, chaqiriq yoshidagi erkaklarni yoki Ukrainadan noqonuniy chiqib ketgan shaxslarni istisno qilish yo‘li bilan) uzaytirish ham bor. Bunday cheklovlarni vaqtinchalik himoya izlayotgan yangi arizachilarga nisbatan qo‘llash mumkin bo‘ladi.

Euractiv ma’lumotlariga ko‘ra, 2026 yil martida Yevropa Ittifoqida 4,33 million ukrainalik vaqtinchalik himoya maqomiga ega bo‘lgan, ulardan 1,27 million nafari Germaniyada yashagan. Ushbu maqomga ega bo‘lganlarning 26,6 foizini katta yoshli erkaklar tashkil etadi.

Avvalroq YEIning ukrainaliklar masalasi bo‘yicha maxsus vakili Ilva Yoxansson DW'ga bergan eksklyuziv intervyusida vaqtinchalik himoya yana bir yilga uzaytirilishini kutayotganini, biroq safarbarlik yoshidagi erkaklar uchun cheklovlar masalasida Yevropa Ittifoqi ichida hali bir to‘xtamga kelinmaganligini va davlatlar uni muhokama qilishda davom etayotganini ma’lum qilgan edi.