Yangihayot tumani hokimligi korrupsiyadan xolimi? Hokim shu va boshqa savollarga javob berdi

Yangihayot tumani hokimligi korrupsiyadan xolimi? Hokim shu va boshqa savollarga javob berdi

Yangihayot tuman hokimi Hayot Inogamov bilan suhbatlashdik. Suhbat davomida hokim Yangihayot tumanidagi jarayonlar hamda boshqa sohalarda o‘z fikrlarini bildirdi.

— Avvalambor assalomu alaykum, Hayot Ilyasovich. Yangihayot tumani tashkil etilganiga ko‘p bo‘lmadi. Biroq, hali “yosh” bo‘lishiga qaramasdan, bir qancha reytinglardagi yuqori natijalarda ushbu tuman nomiga guvoh bo‘lyapmiz. Aytingchi, tumanning tashkil etilishi qanday sodir bo‘ldi va bu o‘zgarish o‘sha hududda yashovchi aholi uchun qanday afzalliklar berdi deb hisoblaysiz. Yangihayot tumani hokimligi korrupsiyadan holi-shaffof hokimiyat bo‘ladi oladimi?

Assalomu alaykum, savolingiz uchun rahmat. Qayd etish lozimki, Toshkent shahrining janubiy g‘arbiy mintaqasida 2017 yildan keyin 460 dan ortiq turar-joy massivlari barpo etilib, ushbu xonadonlar Toshkent shahri aholisining asosan uy-joy sharoitlarini yaxshilashga muxtoj va ehtiyojmand qatlamiga imtiyozli shartlarda taqdim etilgan. Mazkur uylarga 2021 yilga qadar 110 ming nafardan ortiq aholi ko‘chib kelgan.

Yangihayot tumanini tashkil etish tashabbusi Davlatimiz rahbari tomonidan 2020 yil 29 may kuni Toshkent shahriga tashrif doirasida bildirilgan edi. Shundan so‘ng, ishchi guruh tomonidan yangi tumanni tashkil etish bo‘yicha batafsil o‘rganishlar olib borildi va ikki marta – 2020 yil 5 avgust va 21 avgust kunlari hurmatli Prezidentimizga yangi tumanni tashkil etish bo‘yicha loyihalar taqdim etilgan. Yangihayot tumani Toshkent shahrining Sergeli va Bektemir tumanlari hamda Toshkent viloyatining Zangiota, Yangiyo‘l, Quyichirchiq va O‘rtachirchiq tumanlaridan olingan 4419,6 gektar hududda tashkil etilgan. Bugungi kundagi ma’lumotlarga ko‘ra, tuman aholisi 157 ming nafardan ortiqni tashkil etmoqda.

Davlat rahbari tomonidan tuman mas’ullari oldiga “ushbu hududda yashovchi xalqni rozi qilish”, “yangi tumanni respublikada namunaviy tuman bo‘lishini ta’minlash” vazifasi topshirilganini biz juda katta ishonch va mas’uliyat deb qabul qilib, ishni boshlagan birinchi kundan boshqacha ishlashni, aholiga yaqin bo‘lishni, ma’muriy to‘siqlarni olib tashlashni o‘z oldimizga maqsad qilib oldik.

Aholini rozi qilish uchun sektor rahbarlari va tuman hokimining o‘rinbosarlari tomonidan jami 3147 nafar shaxsiy va sayyor qabullar o‘tkazilib, ushbu qabullarda jismoniy va yuridik shaxslarning 5992 ta murojaatlar qabul qilindi. Shundan, 70 foiz murojaatlar ijobiy hal etilib, 25 foiziga huquqiy tushuntirishlar berildi.

Shu bilan birga, ijtimoiy tarmoqlardagi shaxsiy sahifam orqali aholi bilan kundalik “onlayn” muloqotni yo‘lga qo‘ydik. Ushbu muloqotlar orqali 20 foizga yaqin masalalar joyida hal etishga erishildi. Tuman hokimligida shaffoflikni ta’minlash maqsadida ma’muriy binoyimiz ham “open-space” formatida qurilgan.

Endi korrupsiya masalasiga to‘xtalsak, men davlat xizmatiga kelishdan oldin, tadbirkorlik faoliyati bilan shug‘ullanganman. Shuning uchun ayrim fikrlarim boshqa davlat xizmatchilariga nisbatan nostandart bo‘lishi mumkin. Fikrimcha, korrupsiyani keltirib chiqaruvchi eng muhim omillardan biri bu xodimlarga mehnatiga yarasha haq to‘lamaslikdir. Atoqli adibimiz aytganidek “xodimlarga mehnatiga yarasha haq to‘lamasang, to‘lagan maoshingga yarasha ishlay boshlashadi”. Yangihayot tumani hokimligida xodimlar mehnatiga haq to‘lashda bazaviy maoshiga qo‘shimcha oylik ustamalar (oylik ish haqining 200 foizigacha miqdorda) berib boriladi. Bu esa, davlat xizmatchisi uchun raqobatbardosh maosh hisoblanadi va xodimlarning halol ishlashiga sharoit yaratilgan. Korrupsiya holatlariga yo‘l qo‘ymaslik bo‘yicha xodimlar doimiy ogohlantiriladi. Shu sababli, agar kimdandir tuman hokimligi xodimlari ta’magirlik qilsa, huquqni muhofaza qiluvchi organlarga murojaat qilishini so‘rab qolgan bo‘lardim.

— Yangihayot tuman hokimligi tomonidan 1 yil mobaynida juda ko‘p ishlar amalga oshirildi. Xususan, fuqarolar murojaatlari asosida ko‘plab mahallalarning ichki ko‘chalariga asfalt yotqizildi. Yangi 2022 yilda hududda yo‘l infratuzilmasi bo‘yicha qanday rejalarni amalga oshirish ko‘zda tutilgan?

Albatta, o‘tgan 1 yil mobaynida tumanimiz aholisiga qulaylik yaratish maqsadida, yo‘llarni ta’mirlash ishlarini amalga oshirdik. Asosiy e’tiborni Toshkent viloyatidan hududimizga qo‘shilgan mahallalarning ichki ko‘chalarini ta’mirlashga qaratdik. Birgina “Obod mahalla” dasturi ijrosi bo‘yicha “Chortoq” mahallasining 40 ta ichki ko‘chalariga asfalt qoplamasi yotqizildi. Tuman bo‘yicha esa 237 ta ichki ko‘chalarning jami 529 000 kv.m qismi ta’mirlandi. Albatta, yo‘llarni ta’mirlash ishlarida fuarolarimizning murojaatlarini ham o‘rgandik. Buning uchun o‘zim va sektor rahbarlari, o‘rinbosarlar bilan birga kerak bo‘lsa har kuni mahallalarni birma-bir aylanib, aholi bilan suxbatlashdik. Haqiqatdan ta’mirtalab axvoldagi ko‘chalarni ko‘zdan kechirdik va mahalla axliga qulaylik yaratish uchun ushbu ko‘chalarda ham asfaltlash ishlarini olib bordik. Joriy yilgi rejada tumandagi 13 ta mahallaning 35,3 km qismiga jami 214 442,5 kv.metr asfalt yotqizish belgilab olganmiz. Bu yilda ham aholi murojaatlari asosida yo‘llarni ta’mirlashni, har bir mahallada ta’mirtalab yo‘llar qolmasligi uchun harakat qilamiz. Shu bilan birga, serqatnov ko‘chalarni kengaytirib, haydovchilar uchun ham qulaylik yaratishni, piyodalar uchun esa piyodalar yo‘laklarini qurishni, veloyo‘laklar sonini ko‘paytirishni maqsad qilganmiz. Biz songa emas, sifatga ishlashni ko‘zlaganmiz. Toki, biz amalga oshirgan asfaltlash ishlari 3 yil yoki 4 yilga emas, uzoq yillar tumanimiz ahliga xizmat qilsin.

— Tumanda ijtimoiy soha infratuzilmasini yaxshilash doirasida qanday ish tashkil etildi, kelgusidagi rejalar haqida aytib o‘tsangiz?

2021 yilda tumanimizda aholi uchun zarur bo‘lgan ijtimoiy soha ob’ektlarini o‘z muddatida qurib bitkazishga erishdik.

Xususan, 65 va 66-oilaviy poliklinikalar qurilib, ishga tushirildi hamda 3 ta poliklinikalar va “Binokor” filialida tibbiy axborot tizimi “Meddata” ni joriy etish uchun 305,0 mln so‘m ajratildi. Shuningdek, 4 ta mahallalar hududida har biri 235 o‘rinli jami 2 ta hamda 1 ta 335 o‘rinli va 1 ta 480 o‘rinli maktabgacha ta’lim tashkilotlarini qurish ishlari amalga oshirildi. Bundan tashqari, jami 10 ta maktabgacha ta’lim tashkilotlarida umumiy qiymati 5 mlrd 687 mln so‘mlik joriy ta’mirlash ishlari yakunlandi va foydalanishga topshirildi. Tumanda 332-sonli yangi umumta’lim maktabi qurildi. Tuman mahalliy byudjetidan ajratilgan 15 mlrd 843 mln so‘m mablag‘lar hisobiga, Yangihayot tumanida jami 8 ta umumta’lim maktablari binolari va 4 ta umumta’lim maktablarining hovlisidagi sport maydonlari zamonaviy ko‘rinishda joriy ta’mirlandi.

Yil boshidan jami 18 ta mahalla binolarini qurish rejalashtirilgan bo‘lib, bugungi kunda jami 11 ta mahalla binolari foydalanishga topshirildi.

Joriy yilda esa “Istiqbolli” rejalar asosida, tumanni kompleks rivojlantirish maqsadida, Yangihayot tumanini kompleks rivojlantirish maqsadida 4 ta mahallalar hududida zamonoviy va “Smart Garden” ya’ni aqlli maktagacha ta’lim tashkilotlari qurish rejalashtirilgan. Shuningdek, 1 ta oilaviy poliklinika, 1 ta tez tibbiy yordam stansiyasi hamda 1 ta ko‘p tarmoqli shifoxona, 2 ta umumta’lim maktablari va 1 ta musiqa maktabi, 1 ta “Barkamol avlod” maktabi, 1 ta “Bolalar va o‘smirlar” sport maktabi qurish rejalashtirilgan. Hozirda ushbu ob’ektlarini qurish uchun loyiha va loyihaoldi ishlari olib borilmoqda.

Uy-joy bilan ta’minlash va renovasiya dasturini ijrosi yuzasidan 2022-2026 yillar davomida tumanining “Yo‘ldosh” mavzesidagi yashashga yaroqsiz holga kelib qolgan 2 qavatli yog‘och uylarda yashovchi aholi bosqichma-bosqich yangi xonadonlarga ko‘chiriladi.

210 gektar hududda “Yangihayot industrial park” loyihasi boshlanadi.

“Yangi Darxon” mahallasi hududida Yangihayot tumanining ma’muriy markazi barpo etiladi. Ushbu hududda tuman hokimligi hamda davlat organlari va tashkilotlarining tumandagi bo‘limalariga ma’muriy binolar qurish va ularni jihozlash rejalashtirilgan.

Oldimizda ulkan vazifalar, rejalar kutmoqda. Biz yakdil va ahil bo‘lib harakat qilsak, halol-pok bo‘lib, yaxshi niyat bilan mehnat qilsak, har qanday marralarni egallashga imkonimiz mavjud. Hurmatli Prezidentimiz boshchiligida boshlagan barcha xayrli ishlarimiz, albatta, o‘zining ijobiy samarasini beradi.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!