Nogironligi bo‘lgan shaxslarni ish bilan ta’minlaganlar davlatdan subsidiya oladi

O‘zbekiston Respublikasi Adliya vazirligi tomonidan Bandlikka ko‘maklashish davlat jamg‘armasi mablag‘lari hisobidan subsidiya va ssudalar ajratish tartibini belgilovchi idoraviy hujjat davlat ro‘yxatidan o‘tkazildi. Hujjat 2026 yil 7 may kuni 3832-son bilan ro‘yxatga olingan.

Unga ko‘ra, subsidiyalar Jamg‘arma mablag‘lari hisobidan quyidagi maqsadlar uchun ish beruvchilarga ajratiladi:

🔹 bandlik bo‘limi yo‘llanmasi bilan ishga qabul qilingan xodimlarni kasbga tayyorlash, qayta tayyorlash va malakasini oshirish xarajatlarini qoplash uchun — har bir xodimga 6 oy davomida har oy BHMning 4 baravari miqdorida;

🔹 aholining ijtimoiy ehtiyojmand toifalarini belgilangan eng kam miqdordan ortiq ishga qabul qilish uchun — har bir xodimga 12 oy davomida har oy BHMning 2 baravari miqdorida;

🔹 ish o‘rinlari va mehnat sharoitlarini nogironligi bo‘lgan shaxslarga moslashtirish uchun — har bir moslashtirilgan ish joyiga BHMning 40 baravarigacha;

🔹 jazoni ijro etish muassasalaridan ozod qilingan shaxslarni ishga qabul qilgan ish beruvchilarga, mazkur shaxs 3 oydan ortiq mehnat faoliyatini davom ettirganidan so‘ng — bir martalik BHMning 3 baravari miqdorida.

➖ Shuningdek, 2026 yil 1 iyuldan 2028 yil 1 yanvarga qadar quyidagi subsidiyalar ajratiladi:

🔸 o‘qituvchilar va ishlab chiqarish ta’limi ustalariga xalqaro darajada tan olingan kasbiy ta’lim sertifikatlari hamda milliy sertifikatlarni olish uchun sarflangan xarajatlarning 50 foizi, biroq BHMning 20 baravarigacha;

🔸 malakani baholash markazlarini tashkil etgan tadbirkorlik sub’ektlariga xarid qilingan baholash vositalari xarajatlarining 30 foizi, biroq BHMning 200 baravaridan oshmagan miqdorda.

➖ Bundan tashqari, nogironligi bo‘lgan shaxslarga ularning bandligini ta’minlash maqsadida jihozlar, asbob-uskunalar, mehnat qurollari va xomashyo xarid qilish, internet xizmatlariga ulanish, shuningdek tadbirkorlik faoliyatini boshlash yoki kengaytirish uchun 3 yilgacha, 6 oylik imtiyozli davr bilan BHMning 75 baravarigacha miqdorda foizsiz ssuda ajratiladi.

➖ Talabgorlar subsidiya va ssudalarni olish uchun my.gov.uz, “Yagona milliy mehnat tizimi” hamda "Online mahalla" elektron platformalari orqali murojaat qilishlari mumkin.