Yangi qonun bo‘yicha ta’lim krediti kimlarga beriladi?

Ikki va undan ortiq farzandlari to‘lov-shartnoma asosida o‘qiyotgan oilalarga imtiyozli ta’lim krediti beriladi. Hukumat qarori loyihasi jamoatchilik muhokamasi uchun e’lon qilindi.

Qaror loyihasiga ko‘ra, ta’lim kreditlari respublikada faoliyat ko‘rsatayotgan barcha oliy ta’lim muassasalari — davlat, nodavlat, qo‘shma ta’lim dasturlari va xorijiy davlatlar oliy ta’lim muassasalari filiallarida to‘lov-shartnoma asosida tahsil olayotgan O‘zbekiston fuqarolariga, ularning ota-onalari yoki vasiylariga beriladi.

Kredit foizlarini kredit ajratilgandan so‘ng keyingi oyning 1 sanasidan boshlab oyma-oy to‘lash, asosiy qarzni esa talabaning o‘qishi rasman tugagach, uch oy o‘tgandan keyin to‘lash nazarda tutilmoqda.

Qarz oluvchi Ta’lim kreditini rasmiylashtirish uchun tijorat banklariga quyidagi hujjatlarni taqdim etadi:

a) ta’lim krediti berish to‘g‘risidagi ariza;

b) talaba va oliy ta’lim muassasasi o‘rtasidagi to‘lov-shartnoma asosida o‘qish haqida belgilangan tartibda rasmiylashtirilgan shartnoma (kontrakt). Shartnomada o‘qishning belgilangan muddati va bir yil uchun to‘lov miqdori ko‘rsatilgan bo‘lishi lozim. O‘qish uchun to‘lov miqdori keyingi yillarda o‘zgargan hollarda shartnomalarga tegishli o‘zgartirishlar kiritiladi, bu haqda oliy ta’lim muassasasi o‘n kun muddatda bank muassasasiga yozma ravishda ma’lum qiladi, so‘ngra qarz oluvchi, bank va oliy ta’lim muassasasi o‘rtasidagi kredit shartnomasiga zarur o‘zgartirishlar kiritiladi;

g) ta’lim kreditini qaytarishning ta’minlanishi to‘g‘risida hujjat;

d) ta’lim kreditlari olishi uchun bir vaqtning o‘zida ikki va undan ortiq farzandlari to‘lov-shartnoma asosida o‘qiyotganligini tasdiqlovchi hujjatlar nushalarini taqdim etadilar.

Ikki va undan ortiq farzandi to‘lov-shartnoma asosida o‘qiyotgan oilalar sirasiga kamida ikki nafar farzandi bir vaqtning o‘zida oliy ta’lim muassasasida to‘lov-shartnoma asosida ta’lim olayotgan talabalari mavjud bo‘lgan oilalar tushuniladi.

Agarda ikki va undan ortiq farzandi to‘lov-shartnoma asosida o‘qiyotgan oilalarning farzandlaridan bir nafari talabalar safida bo‘lib, qolganlari oliy ta’lim muassasasini tugatgan bo‘lsa yoki boshqa sabablarga ko‘ra talabalar safidan chetlashtirilgan taqdirda, ushbu talabalar boshqa toifadagi talabalar tarkibiga kiritiladi va umumiy asoslarda ta’lim krediti rasmiylashtirishi mumkin bo‘ladi.