Yangi libosga yarashmagan tugma: Klopp qazigan «choh»ga «Liverpul» quladi

Bu galgi Chempionlar ligasi xatolarga boy bo‘ldi, o‘zgacha bo‘ldi, kutilmagan bo‘ldi. Bu holat guruh bahslaridan tortib finalgacha kuzatildi. Ayniqsa, final shunaqa ruhda o‘tdiki, agar menga «Chempionlar ligasi finali boshqatdan o‘tkazilishini istaysanmi?» deyishsa, hech ikkilanmasdan “Ha”, degan bo‘lardim. Chunki men uchun bu final tatimadi. Final boshqacha bo‘lishi kerak edi.

G‘ALABA KERAK, AMMO...

Futbol — kurashuvchan sport turi. O‘zaro kontaktlar, raqobat, jismoniy kurash kechishi tayin. Buni inkor etib bo‘lmaydi. Ammo bu raqibga nisbatan shafqatsizlik qilish kerak degani emas. Biroq g‘alaba uchun, sovrin uchun har narsaga tayyor bo‘lgan Serxio Ramos buni esdan chiqardi. «Liverpul» hujumchisi Muhammad Saloh bilan bo‘lgan vaziyatda u nafaqat to‘p uchun, balki raqibiga jarohat yetkazish uchun ham kurashdi. Xulosa chiqarishga shoshilmang, men bu gapni Ramosning xarakterini, harakatini va ko‘p yillik tajribaga ega ekanligini inobatga olib aytyapman. Ramos qanday harakat raqibga jarohat yetkazishini yaxshi biladi. O‘sha vaziyatda u Salohning qo‘lini qo‘ltig‘iga qisib olgandan ko‘ra yelkasi bilan itarib, to‘pni tepib yuborsa bo‘lardi-ku! Yo‘q, u bunday qilmadi. Ehtimol, u atayin Salohga jarohat yetkazishga urinmagandir, ammo o‘sha xatti-harakati jismonan o‘zidek baquvvat bo‘lmagan Muhammadga jarohat yetkazishi aniqligini hisobga olishi kerak edi. Ammo bu futbol, unda birinchi o‘rinda inson emas, g‘alaba faktori turadi. Har holda, Ramos shunday hisoblaydi.

Aynan Muhammad Saloh jarohat olib maydondan chiqib ketganidan keyin finalga bo‘lgan qiziqishim so‘na boshladi. Chunki «Liverpul» aynan Salohga ishongandi, bu Muhammadning birinchi finali edi. Ha, men finalda hech bir jamoaga muxlislik qilmadim, ammo Salohning o‘zini ko‘rsatishini xohlagandim. Istardimki, boshqa futbolchilar, hatto Ramosning o‘zi ham keyingi safar bunday xunuk xatti-harakatga qo‘l urmasin.

KLOPP QAZIGAN «CHOH»

Har qanday futbolchi o‘yin darajasini his qila bilishi kerak va shunga mos ravishda mas’uliyat hissini ham tuyishi lozim. Finalda «Liverpul» posboni Loris Kariusga aynan shu jihat yetishmadi. Yurgen Klopp unga imkoniyat berdi, Karius garchi unchalik iqtidorli bo‘lmasa-da, «Liverpul»ning asosiy tarkib posboniga aylandi. Ammo finalda u shunchalik qo‘pol xatolarga yo‘l qo‘ydiki, bu «qizillar» uchun juda qimmatga tushdi.

O‘zi boshqargan klublarda doim yangi futbolchi kashf qilishga o‘rgangan Yurgen Klopp «Liverpul»da shu ishini Loris Karius bilan amalga oshirmoqchi bo‘ldi. Belgiyalik posbon Simon Minyoleni zaxiraga o‘tqazib, jamoaga o‘zi olib kelgan Loris Kariusni asosiy tarkibga kiritgan germaniyalik mutaxassis buning uchun yaxshigina pand yedi. To‘g‘ri, Karius APL doirasidagi o‘yinlarda ham ko‘plab xatolarga yo‘l qo‘ygandi, ammo buni kechirsa bo‘lardi. Biroq Chempionlar ligasi finalida, «Liverpul» hatto Muhammad Salohsiz ham iroda ko‘rsatib, ajoyib o‘yin ko‘rsatayotgan bir paytda orziqib kutilgan sovringa ega chiqish imkoni bor paytda yosh bolalarcha xato qilish — bu kechirib bo‘lmas holat. Buni Kariusning tajribasizligi bilan ham oqlab bo‘lmaydi. Chunki Karius yo‘l qo‘ygan xatolarni undan tajribasiz bo‘lgan posbonlar ham takrorlamaydi. Benzema gol urgan vaziyatdagi ahmoqona qarori, Beylning ikkinchi goli yuzaga kelganlagi noo‘rin harakati — aynan shu omillar «Liverpul»ning shashtini sindirdi, qaddini bukib qo‘ydi. Butun mavsum davomida ko‘pchilik Kloppga Kariusning talab darajasidagi darvozabon emasligini uqtirdi, hatto unga qishda boshqa yaxshiroq darvozabon sotib olishni ham maslahat berishdi, biroq germaniyalik mutaxassis Kariusning nigohlarida ishtiyoq ko‘rayotganini, uni tarbiyalab, odam qilmoqchi ekanligini ta’kidladi. Ammo finalda ko‘rdiki, bo‘lmaydigani baribir bo‘lmas ekan. Butun o‘yin davomida yaxshigina zarbalarni qaytargan posbon ikkita qo‘pol xatosi evaziga «Liverpul» muxlislari uchun nafaqat finalning, balki butun mavsumning eng yomon futbolchisiga aylandi. Klopp Kariusni olib kelib, o‘zi qazigan chohga o‘zini ham, «Liverpul»ni ham qulatdi.

Klopp «Liverpul»ni yaxshi jamoaga aylantira olgandi. Kamchiliklarini to‘g‘rilab, yap-yangi libos hosil qildi. Ammo Karius bu ko‘ylakka yarashmagan tugma bo‘ldi. U ko‘ylakni yopib turish vazifasini bajara olmadi, oqibatda libos ochilib qoldi, natijasini esa o‘zingiz ko‘rdingiz.

TAJRIBA YANA QO‘L KELDI

Tan olish kerak, «Real» — Yevropa Chempionlar ligasida g‘alaba qozonish borasida juda katta tajriba to‘pladi. Jamoa hatto o‘zining eng omadsiz mavsumlaridan birida ham Yevropada tengsiz klubga aylandi. Bu mavsum «qirollik klubi» maqtashga arzigulik o‘yin namoyish etmadi, La Ligada 3-o‘rin — bu «Real» ko‘zlagan cho‘qqi emas. Qolaversa, «Bavariya» ham, «Yuventus» ham ming bir mashaqqat bilan, omad bilan taslim etildi. Ammo yakunda «Real» chempionga aylandi. Bu hammasi tajribaning mevasi. Vaziyat shu darajaga yetdiki, «qirollik klubi» uchun Yevropa chempionlar ligasining hatto finali ham odatiy uchrashuvga teng bo‘lib qoldi. Ortiqcha hayajon, asabiylashishlar ortga chekindi.

«Liverpul» va Kloppga ana shu jihat yetishmadi. Salohsiz ham yaxshi o‘yin ko‘rsatgan, hatto Manening goli evaziga hisobni tenglashtirishga ham erishgan «qizillar» qolgan daqiqalar uchun munosib ssenariy tuza olishmadi. Germaniyalik mutaxassis ham bosh qahramondan ayrilgan syujetni qayta shakllantira bilmadi, bunga uringanida esa ssenariyning eng xunuk obrazi — Karius melodramani tragediyaga aylantirib yubordi. Xullas, Kloppdan tortib darvozabongacha tajriba kamlik qildi.

ASOSIY QAHRAMON «REAL» EMAS

Shu o‘rinda alohida ta’kidlash kerakki, bu galgi Chempionlar ligasining bosh qahramoni «Real» emas. Asosiy qahramon — «Liverpul», aniqrog‘i, Yurgen Klopp. Uch mavsumda Yevropa ligasi uchun kurashadigan klubga aylanib qolgan «Liverpul»ni Chempionlar ligasiga olib chiqdi. Endi esa «Liverpul» finalda o‘ynayapti. Bu hammasi Kloppning xizmati. Hatto «Barselona»ga sotilgan Filippe Koutinyoning o‘rni ham bilinmadi. Tarkibda Ronaldu yoki Messidek futbolchi yo‘q. Jamoa yozda boshqa grand klublar singari bir dunyo pul sarflamadi. Ammo «Liverpul» finalgacha chiqdi. Demakki, bu birinchi navbatda Kloppning xizmati. «Liverpul» bu mavsumda APLda 4-o‘rinni olib, keyingi mavsumda yana Chempionlar ligasida o‘ynaydigan bo‘ldi. Shu bois hech kim «Liverpul»ni finaldagi mag‘lubiyat uchun ayblamaydi, aslida, finalga chiqishning o‘zi jamoa uchun katta yutuqqa aylandi. «Liverpul» joriy mavsumda chinakam shijoat, iqtidor, shiddat, mahorat va iroda timsoliga aylandi.

Umid qilamizki, keyingi mavsumda har ikkala jamoaga ham yana omad kulib boqadi. Umid qilamizki, keyingi mavsumda final bunday achinarli ruhda o‘tmaydi. Umid qilamizki, keyingi mavsumda biz bu galgidan-da qiziqarliloq va shiddatliroq bahslarning guvohiga aylanamiz.