O‘zbekistonning SHHTga raisligi: xususiyatlar va samarali natijalar

O‘zbekiston Respublikasining SHHTga raisligi o‘zining eng yuqori cho‘qqisiga yaqinlashmoqda. 15-16 sentyabr kunlari Samarqand shahrida butun jahon hamjamiyatining e’tiborini tortadigan ulkan tarixiy voqea – SHHTga a’zo davlatlar rahbarlarining Sammiti bo‘lib o‘tadi.

Samarqand sammitiga qiziqish ortib borayotgani, avvalambor, bo‘lajak tadbir ishtirokchilari, jumladan, 15 ta davlat rahbarlari, BMT, MDH va boshqa qator xalqaro tashkilotlarning yuqori martabali delegasiyalari vakillarining alohida vakillik tarkibi bilan bog‘liq. Bunday keng ko‘lamli tadbir arafasida O‘zbekistonning SHHTga raisligining xususiyatlarini sarhisob qilish va yodga olish zarur.

Shu o‘rinda shuni alohida ta’kidlash joizki, mamlakatimiz bu sharafli, ammo mashaqqatli missiyaga boshidanoq o‘ta mas’uliyat bilan yondashdi. Pandemiya va global iqtisodiy turg‘unlik bilan bog‘liq qiyinchiliklarga qaramay, O‘zbekiston Tashkilot doirasidagi hamkorlikni mustahkamlashga samarali va izchil hissa qo‘shdi va uning xalqaro nufuzini oshirish yo‘lida tinimsiz mehnat qildi.

SHHT salohiyati va nufuzini mustahkamlash, mintaqada tinchlik va barqarorlikni ta’minlash, qashshoqlikni kamaytirish va oziq-ovqat xavfsizligini ta’minlash borasidagi sa’y-harakatlarni faollashtirish O‘zbekiston raisligining asosiy ustuvor yo‘nalishlari va vazifalari qatoridan belgilandi. Qayd etilgan vazifalar ijrosi doirasida bugungi kunga qadar 100 ga yaqin tadbir muvaffaqiyatli o‘tkazildi, shundan 20 dan ortig‘i tegishli vazirlik va idoralar rahbarlari darajasida bo‘lib, ikkitasi O‘zbekiston tomonidan ilk bor tashkil etilmoqda. Xususan, vazirlik va idoralar rahbarlarining kambag‘allikni qisqartirish va axborot-kommunikasiya texnologiyalarini rivojlantirish masalalariga bag‘ishlangan yig‘ilishlari.

O‘zbekiston tomoni tadbirlarni tashkil etishda yangicha yondashuv va formatlarni joriy qildi. Shu tariqa, tegishli vazirlik va idoralar rahbarlarining yig‘ilishlarini, shuningdek, SHHT Milliy koordinatorlari kengashi yig‘ilishlarini mamlakatimizning turli hududlarida o‘tkazish bo‘yicha samarali amaliyot yo‘lga qo‘yildi.

Bunday noodatiy yondashuv O‘zbekistonning SHHTdagi hamkorlariga mamlakatimiz hududlari salohiyati bilan yaqindan tanishish imkonini berdi. Tadbirlar nafaqat Toshkentda, balki Nukus, Buxoro, Farg‘ona, Xiva, Samarqandda ham o‘tkazildi.

Bundan tashqari, joriy yilning iyun-iyul oylarida O‘zbekistonda bir qator yirik tadbirlar, jumladan, SHHTga a’zo davlatlar sog‘liqni saqlash, energetika, sanoat, qishloq xo‘jaligi va tashqi ishlar vazirlarining uchrashuvlari bo‘lib o‘tdi. Shu bilan birga, SHHT doirasidagi hamkorlikning yangi yo‘nalishlari yo‘lga qo‘yildi, bu esa kun tartibini zamonaviy voqeliklarni hisobga olgan holda boyitishga xizmat qildi. Shunday qilib, O‘zbekiston tashabbusi bilan joriy yilda ilk bor tashkil etilgan SHHT mamlakatlari yoshlari o‘rtasida eng yaxshi startap loyihasi tanlovi, kibersport bo‘yicha chempionat, shuningdek, SHHTning axborot xavfsizligi bo‘yicha ilmiy-ekspert forumi o‘tkazildi.

Toshkentning SHHTga raisligiga qaratilayotgan ulkan e’tiborning yana bir dalili O‘zbekiston Prezidenti Shavkat Mirziyoyevning “Samarqand SHHT sammiti: o‘zaro bog‘liq dunyoda muloqot va hamkorlik” sarlavhali konseptual maqolasidir. Unda Davlatimiz rahbari O‘zbekistonning SHHT bilan munosabatlarining fundamental jihatlari, jumladan, bizning raislik davrida va undan keyingi davrda mazkur tashkilotni rivojlantirishning ustuvor yo‘nalishlari va istiqbollari bo‘yicha o‘z qarashlarini aniq belgilab berdi.

Maqolada “Har birimiz kuchli bo‘lsak, SHHT kuchli” shiori ostida O‘zbekiston Tashkilotni ichkaridan yanada kuchliroq, tashqi tomondan esa xalqaro hamkorlar uchun jozibador qilish uchun jiddiy sa’y-harakatlar qilgani alohida ta’kidlanadi.

Shu munosabat bilan, Prezident ta’kidlaganidek, “O‘zbekiston o‘z raisligi davrida hamkorlik uchun yangi ufqlarni ochib, uning har bir ishtirokchisida mavjud bo‘lmagan zaxiralarni ishga tushirish orqali Tashkilotni ilg‘or rivojlantirish strategiyasiga tayandi”.

Mashaqqatli mehnat natijasida O‘zbekiston bir yil ichida 30 dan ortiq strategik ahamiyatga va amaliy xarakterga ega bo‘lgan SHHTning 30 dan ortiq hujjatlarini kelishish jarayonini boshlash, muvofiqlashtirish va yakunlashga muvaffaq bo‘ldi. Ular SHHTda o‘zaro hamkorlik sohalarini mazmunli kengaytirishga qaratilgan.

Yuqoridagilardan kelib chiqib, O‘zbekiston SHHTga raislikni muvaffaqiyatli amalga oshirish bo‘yicha o‘z oldiga qo‘yilgan barcha vazifalarni to‘liq bajardi, degan xulosaga kelish mumkin.

Shubhasiz, bo‘lajak Samarqand sammiti SHHTni yanada rivojlantirishga kuchli turtki beradi va assosiasiyaga a’zo mamlakatlarning ko‘p qirrali o‘zaro hamkorligini sifat jihatidan yangi bosqichga olib chiqadi. Natijada Tashkilotga raislik estafetasi ilk bor Hindistonga o‘tadi va u SHHT kun tartibidagi dolzarb muammolarni hal etish ustida ishlashni davom ettiradi.

Azamat Sulimanov,
O‘zbekiston Respublikasi Prezidenti huzuridagi Strategik va mintaqalararo tadqiqotlar instituti
etakchi tadqiqotchisi