O‘zbekiston xokkey bo‘yicha U18 Osiyo va Okeaniya kubogiga mezbonlik qiladi — batafsil

O‘zbekiston xokkey bo‘yicha U18 Osiyo va Okeaniya kubogiga mezbonlik qiladi. Bu haqda O‘zbekiston xokkey federasiyasi matbuot xizmati xabar berdi.

Yirik xalqaro turnir joriy yilning 23-30 aprel kunlari Toshkent va Samarqandda bo‘lib o‘tadi.

18 yoshgacha bo‘lgan sportchilar terma jamoalari uchun Osiyo va Okeaniya kubogi (o‘shanda chempionat deya nomlangan) ilk marta 2023 yil mart oyida Mo‘g‘uliston poytaxti Ulan-Batorda tashkil etilgan edi. O‘tgan yilgi musobaqalarda O‘zbekiston terma jamoasi barcha besh uchrashuvda Mo‘g‘uliston, Turkmaniston, BAA, Tailand va Eron terma jamoalari ustidan g‘alaba qozonib, G‘oliblar kubogini qo‘lga kiritdi. Chempionatning eng yaxshi xokkeychisi sifatida o‘zbekistonlik sportchi Jasurbek Rustamxonov tan olindi.

O‘zbekiston g‘olib mamlakat sifatida Xalqaro xokkey federasiyasi rahbarligida 2024 yilda turnirni o‘tkazish huquqini qo‘lga kiritdi. Bu yil turnirda 6 ta emas, balki 10 ta o‘smirlar terma jamoasi ishtirok etadi.

Turnirni o‘tkazish formulasi quyidagicha: ishtirokchilar ikki guruhga bo‘linadi, ularda to‘rtta raqib jamoa o‘zaro bellashadilar. Toshkentdagi “Humo Arena”da bo‘lib o‘tadigan A guruhi matchlarida O‘zbekiston, Tailand, Eron, Malayziya va Kuvayt o‘smirlar terma jamoalari kuch sinashadi. Mo‘g‘uliston, BAA, Hindiston, Makao va Indoneziyaning o‘smirlar terma jamoalari esa Samarqanddagi B guruhi o‘yinlarida o‘z jismoniy tayyorgarliklarini namoyon qiladilar. Jamoalar egallagan o‘rinlarni o‘z guruhlarida taqsimlagandan so‘ng, Toshkentda 9, 7, 5, 3 va 1-o‘rinlar uchun shiddatli o‘yinlar bo‘lib o‘tadi.