O‘zbekiston musulmonlari idorasi raisi, muftiy Usmonxon ALIMOV Matbuot va ommaviy axborot vositalari xodimlarini bayram bilan tabrikladi

Assalomu alaykum va rahmatullohi va barokatuhu!
Hurmatli fidokor va jonkuyar ijodkorlar!

Alloh taologa cheksiz hamdu sanolarimiz, Hazrati Payg‘ambarimiz Muhammad mustafo sollallohu alayhi vasallamga behisob salovotu salomlarimiz bo‘lsin.
Siz azizlarni “27 iyun – Matbuot va ommaviy axborot vositalari xodimlari kuni” munosabati bilan chin qalbimdan samimiy muborakbod etaman.
Muhtaram Prezidentimizning shaxsiy tashabbuslari bilan aksariyat sohalar kabi ommaviy axborot vositalari faoliyatida ham e’tirofga loyiq yangiliklar, o‘zgarishlar va yuksalishlar joriy etildi.
Kuni kecha e’lon qilingan muhtaram Yurtboshimizning Matbuot va ommaviy axborot vositalari xodimlariga yo‘llagan tabriklarida: “Jahon miqyosida yuz bergan pandemiya tufayli vujudga kelgan bugungi murakkab vaziyat va qiyinchiliklarga qaramasdan, aholiga tezkor va ishonchli axborot yetkazib berish, mamlakatimizda amalga oshirilayotgan demokratik islohotlarni atroflicha aks ettirish yo‘lida o‘z professional burchini sidqidildan ado etib kelayotgan siz, jurnalistlar ahliga chuqur minnatdorchilik bildiraman, degan ilhombaxsh so‘zlar barcha ijod ahli cheksiz mamnun etdi.
O‘z navbatida biz din peshvolari ham ushbu fidoyi, murakkab, mas’uliyatli va olijanob kasb vakillarini sharaflaymiz. Bu kasb bayrami so‘nggi yillarda yangicha mazmun kasb etdi. Muhtaram Prezidentimizning kuchli irodasi, uning xalq bilan muloqotni yo‘lga qo‘yish, so‘z va axborot erkinligini ta’minlashdagi tinimsiz tashabbuslari natijasida tashkilot va muassasalarning ochiqligi va shaffofligi ta’minlanmoqda.
Ishonch bilan aytish mumkinki, jurnalistlar va blogerlar mamlakat hayotining ajralmas qismiga aylandi, aholi orasida ularning nufuzi oshdi. Bu esa ularning xalqimiz hurmati va ehtiromiga sazovor bo‘layotganidan darak beradi. Bu holat hech kimga xotirjamlikka berilishga yo‘l qo‘ymayapti, doim voqea-hodisalardan xabardor bo‘lishni va mutasaddilarga esa jamiyat oldidagi vazifalarini muntazam eslatib turibdi.
Alloh taologa shukrki, muborak dinimizni keng yoyish, diniy-ma’rifiy ishlarni xalqimizga to‘laqonli yetkazishda ijod ahlining juda ham katta o‘rni bor, albatta.
Mo‘min-musulmonlar manfaati, din g‘ami va Vatan taqdirini yuragidan o‘tkazib ishlaydigan Siz kabi ijod ahlining da’vatkor so‘zi, ibratli faoliyati juda ham tahsinga loyiqdir. Zero, Qur’oni azimush-sha’nda shunday marhamat qilinadi:
«Ey Muhammad, Rabbingiz yo‘li-diniga hikmat va chiroyli nasihat bilan da’vat qiling! Ular bilan eng go‘zal uslubda munozara qiling! Albatta, Parvardigoringizning o‘zi Uning yo‘lidan chalg‘igan kimsalarni yaxshi biluvchi va hidoyat topganlarni ham U biluvchiroqdir» (Nahl, 125).
Shuning uchun ijod ahlini Alloh taoloning mana shunday xitobiga amal qilgan holda ezgulikni yoyish, ilmu ma’rifatni tarqatishda eng go‘zal uslubni tanlagan holda imkoniyatlardan unumli foydalanish lozimdir.
Hazrati Alisher Navoiy bobomiz “Muhokamatul-lug‘atayn” asarida quyidagi misralarni keltiradi:
Chu men nazm aro tortib alam,
Ayladim ul mamlakatni yakqalam.
Olib men taxti farmonimg‘a oson,
Cherik chekmay Xitodin to Xuroson.
Ya’ni, Hazrati Navoiy nazm ila mamlakatni yakdil qildim, Xitoydan to Xurosongacha bo‘lgan hududni qo‘shinsiz egalladim, degan mazmunni ifoda etganlar.
Marhum shoirimiz Abdulla Oripov shu misralar ta’sirida “Temur tig‘i yetmagan joyni qalam bilan oldi Alisher”, deb bejizga qayd qilmagan edilar.
Demakki, kishilarni hamjihatlikka chaqirishda, hidoyat yo‘liga boshlashda, ilmu ma’rifatini keng yoyishda ijod ahlining pandu nasihati va mazmunli chiqishlarining o‘rni juda ham kattadir.

Hurmatli ijodkorlar!
Ta’kidlash joizki, so‘nggi yillar davomida axborot xizmatlari faoliyati takomillashib, media makonda yuzaga kelayotgan chaqiriqlarga tezkorlik bilan munosib javob kaytarish ishlari shakllandi.
Mamlakatda amalga oshirilayotgan islohotlar to‘g‘risidagi ma’lumotlarni o‘z vaqtida taqdim etish, aholiga tezkor va to‘liq axborot yetkazish, ochiqlik va shaffoflikni ta’minlashda sezilarli natijalarga erishildi.
Jahonning ilg‘or davlatlarida matbuot kotiblari allaqachon juda muhim shaxslarga aylanib ulgurgan. Jamoatchilik ularning bayonotini kutadi, ularni izlaydi va qadrlaydi. Yurtimizda ham bu yo‘nalishda ko‘rilayotgan chora-tadbirlar natijasida kelgusida matbuot kotiblarimiz tom ma’noda jamiyatimizdagi muhim shaxslarga aylanishiga ishonaman.
Matbuot kotiblarini yanada faollikka, dadillikka va tezkorlikka chaqirgan bo‘lardim. Ushbu kasb egalari eng zarur paytda, eng zarur va rost gapni aytishi lozim. Axborot xizmatlari xodimlari nafaqat matn yozishni, balki zamonaviy media usullaridan keng foydalanishlari ham zarurdir. Shu orqali media makonda to‘g‘ri ma’lumotlar yetkazilib, noxolis va noto‘g‘ri xabarlar tarqalishi holatlari o‘z vaqtida bartaraf etiladi.
O‘z o‘rnida aytish kerakki, ijodkorlarga munosib shart-sharoit yaratib berilsa, mehnatlarini munosib taqdirlansa, ular erkin ijod qiladi, shunda ko‘zlagan maqsadlarga erishiladi, insha Alloh.
Ijod ahli mehnatini naqadar mashaqqatli ekanini anglagan kishi sifatida kamina, sizlarning sa’y-harakatingizni doimo qo‘llab-quvvatlayman, sizlarni eng asosiy tayanchim va eng yaqin yordamchim deb bilaman. Har bir insonning yurak-yuragiga kirib boruvchi va hayotimizni yanada yaxshilashga xizmat qiluvchi so‘zingiz uchun sizdan chin dildan minnatdormiz. Sizlarni doimo yaxshi ko‘rib qolishimni izhor qilishdan esa juda ham baxtiyorman. O‘z navbatida O‘zbekiston musulmonlari idorasi barcha ijodkorlar bilan yaqindan hamkorlik qilishga tayyor ekanini ma’lum qilaman.
Imkoniyatdan foydalanib, o‘ta muhim va mas’uliyatli vazifalarni amalga oshirishda barcha ommaviy axborot vositalari vakillari, axborot sohasida ish yuritayotgan jonkuyarlarimizga sihat-salomatlik, kuch-g‘ayrat hamda ulkan zafarlar tilayman.
Barcha ijodkor xodimlarni yana bir bor kasb bayramlari bilan muborakbod etaman.
Qalamingiz o‘tkir, so‘zlaringiz ravon, chiqishlaringiz ta’sirchan bo‘lib, doimo mo‘min-musulmonlarimiz ardog‘ida bo‘ling, barchangizga baxtu saodat, ijodiy yutuqlar tilayman.
Vassalomu alaykum va rahmatullohi va barokatuhu.