UNICEF G‘azodagi vaziyatni ocharchilik xavfi tufayli “mutlaq falokat” deb atadi

UNICEF vakili Tess Ingram G‘azo shahrida ocharchilik tarqalishi xavfi haqida ogohlantirib, aholi farzandlari uchun oziq-ovqat topish uchun iztirob bilan kurashayotganini ta’kidladi va vaziyatni “mutlaq falokat” deb baholadi.

Ingramning so‘zlariga ko‘ra, shaharning sharqiy va shimoliy hududlarida shiddatli hujumlar davom etmoqda, aholi esa g‘arbga — dengiz bo‘yiga qochib, vaqtinchalik chodir va boshpana qurayotir. Shifoxona direktorlari ham so‘nggi kunlarda jarohatlar bilan kelayotganlar soni keskin ko‘payganini bildirishgan.

BMT tasnifiga ko‘ra, 22 avgustdan beri G‘azoda ocharchilik rasman qayd etilgan bo‘lsa-da, vaziyat yaxshilanmagan. Ingram:

“Agar hech nima o‘zgarmasa, bir necha hafta ichida ochlik shahar markaziga ham tarqalishi mumkin. Men uchratgan ota-onalar: ‘Oziq-ovqat qachon keladi? Farzandam shu vaqtgacha omon qoladimi?’ deb yig‘lashdi. Bu haqiqiy falokat”, — dedi.

Uning ta’kidlashicha, 15–20 foiz bolalar to‘yib ovqatlanmaslikdan aziyat chekmoqda. Bu ko‘rsatkich ocharchilik chegarasidan yuqori. Joriy yilning o‘zida 110 dan ziyod bola ochlikdan vafot etgan.

Ingram bu holat sun’iy ravishda yuzaga kelganini, uni oldini olish mumkinligini aytdi. UNICEF favqulodda yordam yuborishga chaqirdi va aholi ehtiyojini qondirish uchun har kuni yuzlab yuk mashinalari kirib borishi shartligini ta’kidladi.