“U tug‘ilmasligi ham mumkin edi”. O‘zidan 15 yosh kichik muxlisiga uylangan, giyohvandlik tufayli qamalgan turk xonandasi Tarkan hozir qanday yashaydi?

Turkiyaning sevimli qo‘shiqchisi Tarkan bir paytlar zallarni energiya bilan to‘ldirgan ajoyib iste’dodi bilan mashhur edi. Mashhur xonanda 2000 yillarda butun dunyo bo‘ylab stadionlarni to‘ldirib, barcha mamlakatlarning musiqiy jadvallarida yetakchilik qilgan.

Hozir qo‘shiqchi kamtarona Turkiya gastrollarida bo‘lib, imkoniyatlariga qaramay jahon sahnasini zabt etishga urinishdan voz kechganga o‘xshaydi. Uning karyerasi qanday boshlangan va ancha vaqtgacha ko‘rinmay qolganiga nima sabab bo‘lgan?

U tug‘ilmasligi ham mumkin edi

1972 yil 17 oktyabrda Germaniyaning Alsay shahrida Tevetog‘lular oilasida o‘g‘il chaqaloq tug‘iladi. Uning ota-onasi Ali va Neshe unga 60 yillarda Turkiyada mashhur bo‘lgan kitob qahramoni sharafiga Tarkan ismini beradi. Uning ikkinchi ismi Husamettin bo‘lib, “o‘tkir qilich” degan ma’noni anglatadi, chunki uning bobosi rus-turk urushi qahramoni bo‘lgan. Bo‘lajak xonanda tug‘ilmasligi ham mumkin edi. Homiladorlik paytida onasi baxtsiz hodisaga uchraydi va komaga tushib qoladi. Shifokorlar homilani olib tashlamoqchi bo‘lishadi, er-xotinni bunga zo‘rg‘a ko‘ndirishadi. Lekin bir kun oldin ikkalasi ham tushida bolani saqlab qolishga undagan qariyani ko‘radi.

Shunday qilib, tug‘uruqxonada baland ovozda chinqirgan holda o‘g‘il chaqaloq tug‘iladi va doya uning qo‘shiqchi bo‘lishini bashorat qiladi. Aytgancha, Tarkanning ona tomondan ajdodlari xalq musiqachilari bo‘lgan. Kelib chiqishi turk bo‘lgan ota-onasi iqtisodiy inqiroz paytida Germaniyaga ko‘chib ketishgandi, ammo 1986 yilda oila vatanga qaytib keladi. Otasi va akalari ish topishadi, kichik Tarkan esa o‘qishni davom ettiradi. Bola nafaqat oddiy maktabga, balki musiqa maktabiga ham boradi. Tarkan Maktabni tugatgach, Istanbuldagi musiqa akademiyasiga o‘qishga kiradi. O‘sha paytdayoq u taniqli xonanda bo‘lib, to‘ylarga chiqib yurgan. 1995 yilda oila boshiga musibat tushadi — otasi yurak xurujidan vafot etadi.

Onasi ko‘p o‘tmay yana turmushga chiqadi. O‘sha yili Tarkanni armiyaga chaqirish bilan tahdid qilishadi, u esa borishni xohlamasdi. Uning bobosi rus-turk urushi qahramoni bo‘lganiga qaramay, Tarkanning o‘zini pasifist deb bilar, harbiy xizmat u uchun emas edi. Uch yillik muhlat olgandan keyin u Turkiyani tark etadi. Keyinchalik mamlakatda bor-yo‘g‘i 28 kun xizmat qilishiga ruxsat beruvchi qonun qabul qilinganida, xonanda vatan oldidagi burchini o‘tashga qaror qiladi.

Musiqiy karyerasi

Tarkan tez-tez Germaniyaga kelib-ketib yurardi. Tashriflarining birida Istanbul Plak leybli direktori Mehmet Soyutoulu bilan tanishadi. U Tarkanda istiqbolli, iste’dodli va xarizmatik yigitni ko‘radi va unga “Yine sensiz” albomini chiqarishga yordam beradi. Birinchi diskning muvaffaqiyati 1994 yilda “Aacayipsin” deb nomlangan ikkinchi albomning chiqishiga olib keladi.

Aynan shu albom bilan Tarkan o‘zining birinchi xorijiy gastrol safariga chiqadi va Yevropada 85 ta konsert beradi. Dastlab uning yevropalik auditoriyasi asosan muhojir oilalardan bo‘lgan turk o‘smirlaridan iborat bo‘lsa-da, tez orada musiqasi ommalashadi va yevropaliklar ham uning muxlisiga aylanadi.

2001 yilda chiqarilgan navbatdagi “Karma” albomi ham omadli chiqadi. U butun Yevropa bo‘ylab 1 million nusxada sotiladi. Albomda “Kuzu-Kuzu” va “Hüp” kabi mashhur qo‘shiqlar o‘rin olgan. Tarkan nafaqat Turkiyada, balki butun dunyoda, Osiyo, Yevropa va Meksikadagi fan-klublarning mutlaq yulduziga aylanadi. 2002 yilda Turkiyada bo‘lib o‘tgan futbol bo‘yicha jahon chempionatida Tarkan futbol madhiyasini yozadi.

2000 yillarning birinchi yarmida u faol ijod qilishni davom ettiradi. 2003 yilda qo‘shiqchi o‘zining HITT Music leyblida “Dudu” mini-albomini chiqaradi. Keyingi ikkita “Metamorfoz” va “Adımı Kalbine Yaz” albomlari ham juda mashhur bo‘ladi. Tarkan so‘nggi albomi uchun to‘rt nominasiyada Turkey Music Awards mukofotini qo‘lga kiritadi.

Giyohvandlik va mashhurlikdan tushish

Tarkan turk bastakori Sezen Aksu bilan hamkorlik qilishni boshlaydi va ingliz tilidagi birinchi albomini yozish uchun Nyu-Yorkka ketadi. U turk-amerikalik biznesmen va Atlantic Records leybli asoschisi Ahmet Ertegun bilan ishlay boshlaydi. Biroq Tarkan ingliz tilidagi albomini faqat 2006 yilda, Ertegun vafot etganidan keyin chiqaradi. Bu albom muvaffaqiyatli bo‘lmaydi. Turkiyada atigi 110 ming nusxada sotiladi xolos.

2007 yilda Tarkan turk tilida “Metamorfoz” nomli albomini chiqaradi, lekin u ham muvaffaqiyatga erishmaydi — birinchi haftalarda Turkiyada atigi 300 ming nusxada sotiladi. 2010 yil fevral oyida Tarkan, shuningdek, turk shou-biznesining yana bir qancha vakillari giyohvandlikka qarshi operasiya doirasida hibsga olinadi — qo‘shiqchi do‘stining villasida bo‘lganida, polisiya o‘sha yerdagilar noqonuniy moddalar iste’mol qilayotganini da’vo qilib bostirib kirgan.

Keyinchalik Tarkanning uyidan ham narkotik moddalar topilgan. Turkiya OAVlarining xabar berishicha, Tarkan vaqti-vaqti bilan giyohvand moddalarni iste’mol qilganini tan olgan va reabilitasiya kursidan o‘tishga rozi bo‘lgan. 2017 yildan Tarkan yangi musiqalar yozishni vaqtincha to‘xtatadi, ammo eski xitlari bilan sahnada chiqishda davom etaveradi. 2022 yildan beri Tarkan butun Turkiya bo‘ylab gastrol konsertlarida qatnashmoqda. Shuningdek, u bir nechta yangi — “Geccek” va “Yap bi guzellik” qo‘shiqlarini ham chiqardi.

Xonandaning shaxsiy hayoti

Xonanda doim turmush qurishga qarshi bo‘lgan, u erkin yashashni va nikoh majburiyatlaridan xalos bo‘lishni afzal ko‘rardi.

Shu sababdan ham u ancha vaqtgacha Bilge O‘zturk yaqin munosabatlarda bo‘lsa-da, unga uylanmaydi. Qiz advokat bo‘lib ishlagan, bo‘sh vaqtlarida rok guruhida qo‘shiq kuylagan. 2008 yilda juftlik ajralishadi. 2011 yilda 39 yoshli Tarkan o‘zining sodiq muxlisi, o‘sha paytda 24 yoshda bo‘lgan Pinar Delek bilan tanishadi.

Ular 2016 yilda turmush qurishadi va ikki yildan so‘ng ularning qizi Liya tug‘iladi. Tarkan oilaviy fotosuratlarni tez-tez baham ko‘rmaydi, shuningdek, xotiniga ijtimoiy tarmoqlarda akkaunt ochishni taqiqlaydi. Xonanda hech qachon qizining yuzini ko‘rsatmagan. Ular Istanbuldagi hashamatli villada yashashi ma’lum, xolos.

Tarkan hozirda

Tarkan bo‘sh vaqtlarida sport bilan shug‘ullanish va proteinli diyetaga rioya qilish orqali sog‘lig‘ini nazorat qilib boradi. Musiqadan tashqari, uning bir nechta biznesi bor: u erkaklar va ayollar uchun parfyumeriya hamda bayramona liboslar ishlab chiqaradi.

Ma’lumki, 2023 yil fevralda Turkiyada bir qator vayronkor zilzilalar sodir bo‘ldi. Tarkan jabrlanganlarga yordam ko‘rsatgan aktyor Haluk Levent fondiga 1 million lira o‘tkazadi. Ushbu saxovatli hissa eng muhimlaridan biriga aylanadi. Tarkan muhtojlarga birinchi marta yordam berayotgani yo‘q. 90 yillarda Izmirdagi zilziladan keyin jabrlanganlarga yordam berish uchun 16 ming dollar xayriya qilgan.

Bundan tashqari, Tarkan ekofaollariga qo‘shilgan va atrof-muhit holatidan chuqur tashvishda ekanini aytadi. U Akbelendagi o‘rmonlarning kesilishiga faol qarshilik ko‘rsatgan — u zaytunzorlarni saqlab qolish tarafdori. Ammo ba’zi turklar uning ekologiya sohasidagi faoliyatini shunchaki piar, deb hisoblaydi.