Trampning bo‘lajak maslahatchisi Ukrainani harbiy xizmatga chaqirish yoshini kamaytirishga chaqirmoqda

Donald Tramp o‘zining milliy xavfsizlik bo‘yicha maslahatchisi etib tayinlamoqchi bo‘lgan amerikalik kongressmen Mayk Uoltsning aytishicha, Ukrainadagi urushni tugatish bo‘yicha har qanday kelishuvga erishish uchun front chizig‘ini barqarorlashtirish zarur.

ABC News jurnalistiga bergan intervyusida Uolts bunday barqarorlashtirish shartlaridan biri Ukraina Qurolli Kuchlariga "yuz minglab yangi askarlarni" jalb qilish uchun Ukrainada chaqiruv yoshi chegarasini kamaytirish bo‘lishi kerakligini aytdi.

“Ukrainaliklardan so‘raydigan narsalardan biri... Ularda ishchi kuchi bilan bog‘liq muammolar bor. Ular 18 yoshlilarni emas, 26 yoshlilarni chaqirishadi. Ko‘pchilik buni tushunmaydi, deb o‘ylayman, - dedi Uolts. “Ma’naviyat bilan bog‘liq muammolar haqida eshitganimizda, frontdagi muammolar haqida eshitganimizda... Ko‘ryapsizmi, agar ukrainaliklar dunyodan demokratiyani himoya qilish uchun hamma narsani qilishni so‘rasa, ular ham demokratiyani himoya qilish uchun hamma narsani qilishlari kerak”.

"Ular, albatta, jasorat bilan jang qilishdi, ular, albatta, olijanob va qat’iyat bilan kurashdilar, ammo bu kadrlar bilan bog‘liq muammolarni hal qilish kerak", deya qo‘shimcha qildi Uolts.

Ko‘plab G‘arb ommaviy axborot vositalari rus qo‘shinlarining frontdagi so‘nggi muvaffaqiyatlarining asosiy sabablaridan biri ularning ishchi kuchi bo‘yicha muhim ustunligi ekanligini ta’kidladilar.

Jurnalistlarning so‘zlariga ko‘ra, AQShning amaldagi prezidenti Jo Bayden ma’muriyati vakillari allaqachon Ukraina hukumatini chaqiruv yoshini joriy 25 yoshdan tushirishga chaqirishgan.

Ammo Zelenskiy bunga javoban, asosiy muammo Ukraina Qurolli Kuchlarida frontdagi odamlar emas, balki G‘arb qurollarining yo‘qligida ekanligini bir necha bor ta’kidlagan.

“Agar sizning oldingizda qurolsiz odam tursa, bu odam 20 yoshdami yoki 30 yoshdami, nima farqi bor? Farqi yo‘q”, dedi u dekabr oyi o‘rtalarida safarbarlik yoshini pasaytirish haqidagi savolga javob berar ekan.

Zelenskiy, shuningdek, Ukraina Qurolli kuchlarining xorijda mashg‘ulotlardan o‘tishi kerak bo‘lgan 14 ta brigadasidan faqat ikkitasi zaruriy tayyorgarlikdan o‘tishga muvaffaq bo‘lganini aytdi – bu aynan qurol-yarog‘ yo‘qligi bilan bog‘liq.