Tramp saylovda g‘alaba qozonsa, Putin bilan munosabatlarni yaxshilamoqchi

AQSh prezidentligiga Respublikachilar partiyasidan nomzod Donald Tramp noyabr oyida bo‘lib o‘tadigan saylovlarda g‘alaba qozonsa, yana Rossiya yetakchisi Vladimir Putin bilan til topishishga umid qilishini aytdi . Bu haqda sobiq prezident X ijtimoiy tarmog‘ida amerikalik tadbirkor, ijtimoiy tarmoq egasi Ilon Maskga bergan intervyusida ma’lum qildi.

Uning so‘zlariga ko‘ra, prezidentlik davrida u Vladimir Putin bilan «juda yaxshi» munosabatlarga ega edi. Trampning ta’kidlashicha, uzoq vaqtdan beri muhokama qilinayotgan Rossiya bilan aloqalar bo‘yicha da’vo qilingan ayblovlarga qaramay, uning Rossiya rahbari bilan o‘zaro munosabatlari ijobiy bo‘lgan. Tramp Putinni yaxshi bilishini va u bilan do‘stona munosabatlarga ega ekanligini hamda Rossiya prezidenti unga hurmat ko‘rsatishini ta’kidladi.

Siyosatchi, shuningdek, Rossiya rahbarini «yaxshi muzokarachi» deb bilishini aytdi. Shu bilan birga, u Oq uyning amaldagi rahbari Jo Bayden Ukrainani NATOga qabul qilish imkoniyatiga yo‘l qo‘yib, ahmoqlik qilganini ta’kidladi .