"STIXIYa" — Markaziy Osiyo miqyosidagi noyob madaniy va ko‘ngilochar tadbir

So‘nggi yillarda yurtimizda barcha sohalar kabi, turizm sohasi ham jadal rivojlanib bormoqda. Respublikada ichki Turizmni ommalashtirish, xorijiy turistlar oqimini jalb qilish maqsadida hukumatimiz tomonidan bir qator qarorlar, loyihalar amalga oshirilmoqda, yangi tashabbuslar qo‘llab-quvvatlanmoqda. Turistik mavsum mobaynida dunyoning qator davlatlaridan ko‘p sonli xorijiy turistlar oqimini jalb qilishi uchun bugungi kunda yurtimiz yetarli turistik salohiyatga egadir.

O‘z o‘rnida Qoraqalpog‘iston Respublikasi ham O‘zbekistonning boshqa hududlari kabi o‘ziga xos tomonlariga ega. Jumladan hududning tarixi, madaniyati, urf-odatlari, turmush tarzi, qadimiy madaniy meros ob’ektlari va shu kabi diqqatga sazovor ob’ektlari bilan ajralib turadi. Yuqorida keltirib o‘tilgan xususiyatlar Qoraqalpog‘istonning turistik salohiyatini yanada oshiradi.

Qoraqalpog‘iston Respublikasi Turizm va madaniy meros vazirligi tomonidan bugungi kunda Qoraqalpog‘istonning turistik salohiyatini keng targ‘ib qilish, ushbu hududga tashrif buyuruvchi turistlar oqimini ko‘paytirish bo‘yicha keng ko‘lamli ishlar amalga oshirilib kelinmoqda. Jumladan, turistik ob’ektlar bo‘yidagi infratuzilmani yaxshilash, yirik avtomagistrallar bo‘yida sanitar-gigiyenik shoxobchalar sonini ko‘paytirish va ularning sifat darajasini oshirish, turistlarga xizmat ko‘rsatuvchi turistik korxonalar, joylashtirish vositalari, jumladan, mehmonxona, xostel va oilaviy mehmon uylari sonini ko‘paytirish, yangi turistik marshrutlarni ishlab kabi bir qator ishlar amalga oshirilib kelinmoqda.

Turizm sohasida bunyodkorlik ishlari ham amalga oshirilmoqda. Jumladan, respublikaga tashrif buyuruvchi turistlar uchun xizmat darajasini oshirish va yangi qulayliklarni yaratish maqsadida shu kungacha ko‘p sonli joylashtirish ob’ektlari barpo etilgan. Ko‘rsatkichlarga keladigan bo‘lsak, hozirgi vaqtda Qoraqalpog‘istonda 45 turistik korxona, shuningdek 86 joylashtirish vositalari mavjud bo‘lib, shular qatoridan 33 mehmonxona, 36 oilaviy mehmon uylari va 17 xostellar o‘rin olgan. Bundan tashqari 11 mikroavtobus, 45 yo‘l tanlamas avtotransport vositalari va 12 kvadrasikl, 25 gid-tarjimonlar, 200 dan ortiq turistik namoyish ob’ektlari (hunarmandlar ustaxonalari, ko‘ngilochar parklar, muzeylar, akvapark va suv attraksionlar) faoliyat ko‘rsatmoqda. Global pandemiya davriga qaramasdan 2021-yil davomida Qoraqalpog‘istonga 284 ming mahalliy va 25 mingga yaqin xorijiy turistlar tashrif buyurgan.

Qoraqalpog‘iston Respublikasining shahar va tumanlari alohida turistik destinasiyalar bo‘lib hisoblanadi va ular qatoriga Nukus shahri, Chimboy tumani, Qoraqalpg‘istonning janubiy hududi (Ellikqal’a, To‘rtko‘l va Beruniy tumanlari) va albatta Mo‘ynoq tumani ham kiradi. Ushbu tumanlarni hududning turistik salohiyati va o‘ziga xos tomonlaridan kelib chiqib, turizmning yo‘nalishlari bo‘yicha alohida o‘ringa ega.

Mo‘ynoq tumani alohida turistik destinasiya sifatida bir qator diqqatga sazovor joylarga ega bo‘lib, o‘ziga xos tomonlari bilan ajralib turadi va so‘nggi yillarda turistlar orasida tobora mashhur bo‘lib bormoqda. Mo‘ynoq bugungi kunda bir vaqtning o‘zida bir necha turizm yo‘nalishlari bo‘yicha turistik salohiyatga egadir. Jumladan, Ekoturizm yo‘nalishiga oid Orol dengizi, Ustyurt platosi, Sudochye ko‘li kabi tabiiy ob’ektlar mavjud bo‘lib, mahalliy turistik korxonalar tomonidan tashrif buyurgan turistlar uchun zamonaviy yo‘ltanlamas avtovositalarida ekstremal djip-tur tashkil etilmoqda. Orol dengizi bo‘yida joylashgan o‘tovlar majmuasida esa tashrif buyuruvchilarda o‘zgacha muhitga kelib qolgandek taassurotlarini uyg‘otadi. Etnoturizm yo‘nalishi bo‘yicha mahalliy aholining tarixi, urf-odatlari, o‘tmishda Orol dengizi bilan chambarchas bog‘liq bo‘lgan va bugungi kunda ham saqlanib qolgan turmush tarzi katta o‘rin tutadi. Masalan Baliqchilar uy-muzeyi, Orol dengizi tarixi muzeyi, hunarmandlar xiyoboni kabi maskanlar tashrif buyurgan mehmonlarda Mo‘ynoq xalqining o‘tmishdagi tarixi va turmush tarzi haqida katta taassurotlar uyg‘otadi. O‘tmishda Orol dengizi o‘zining ko‘p turdagi baliqlari bilan juda taniqli bo‘lgan. Mahalliy aholi tomonidan dengizdan ovlangan baliqlardan turfa xil mazali taomlar tayyorlangan. Mana bugun, Orol dengizi yo‘q bo‘lib ketayotgan bo‘lsa ham o‘tmishdagi aynan Mo‘ynoqcha uslubda tayyorlanadigan baliq taomlarini qayta tiklash va ommalashtirish, shuningdek turistlar orasida keng targ‘ibot qilish maqsadida so‘nggi yillarda Mo‘ynoq shahrida “Orol baliqlaridan 99 xil taom” deb nomlanadigan xalqaro gastronomik festivali o‘tkazilib kelinmoqda. O‘z o‘rnida ushbu festival hududda Gastronomik turizm yo‘nalishini rivojlanishida katta hissasi qo‘shib kelmoqda.

Festival va ommaviy tadbirlar mavzusini davom ettiradigan bo‘lsak, shuni ham aytib o‘tish lozim ki, so‘nggi yillarda ko‘p sonli turistlar oqimini jalb qilish maqsadida Mo‘ynoqda “NavrUz” etnofestivali, “STIXIYA” xalqaro elektron musiqiy, san’at va ilm-fan festivali, Ustyurt tekisligi bo‘ylab “RALLY-MUYNAK” ekstremal avtopoygasi kabi madaniy va ko‘ngilochar tadbirlar tashkil etilib kelinmoqda. Ushbu tadbirlar ko‘p sonli mehmonlarni jalb qilish bilan birga Orol ekologik fojiasiga dunyo e’tiborini tortishda katta ahamiyatga ega. Bunday ommaviy tadbirlarni 2022-yilda ham o‘tkazish va ularning sonini ko‘paytirish maqsad qilingan. O‘zbekiston Respublikasi Vazirlar Mahkamasi tomonidan 2022-yil davomida Respublikada o‘tkaziladigan madaniy-ko‘ngilochar va ommaviy sport tadbirlarining Taqvim rejasi ishlab chiqildi. Mazkur rejaga asosan shular qatorida Mo‘ynoq tumanida ham qo‘ydagi ommaviy tadbirlarni tashkil etish ko‘zda tutilgan.

Mo‘ynoqning turistik ob’ektlariga keladigan bo‘lsak shaharning o‘zida “Hunarmandlar xiyoboni”, “Shoirlar xiyoboni”, “Muynak Times” minora-soati, “Orol dengizi tarixi muzeyi”, “Mayak” o‘tovlar majmuasi, Ekologiya muzeyi kabi yirik madaniy, madaniy-ko‘ngilochar, va selfi-ob’ektlar ham barpo etilgan. Turistik infratuzilma ob’ektlari qatorida 2 o‘tovlar majmuasi, 1 mehmonxona, 6 xostel, 12 oilaviy mehmon uylari va 10 ga yaqin zamonaviy umumiy ovqatlanish o‘rinlari bugungi kunda bu yerga tashrif buyuruvchi turistlarga xizmat ko‘rsatib kelmoqda.

26 mart kuni O‘zbekistonda ilk «Toshkent-Nukus-Mo‘ynoq» yo‘nalishi bo‘yicha aviaqatnov amalga oshirildi. Ta’kidlash lozimki, 1990 yillaridan beri aviatashuvlar maqsadida foydalanilmayotgan Mo‘ynoq aeroporti Prezident Shavkat Mirziyoyev topshirig‘iga binoan qayta rekonstruksiyadan chiqarildi va foydalanishga topshirildi.

Ikki yildan ortiq vaqt ichida ushbu aeroport uchun yangi terminal binosi, aeroport atrofidagi to‘siqlar va uchish-qo‘nish yo‘lagi barpo etildi. Endilikda «Toshkent-Nukus-Mo‘ynoq» hamda «Mo‘ynoq-Nukus-Toshkent» yo‘nalishida haftasiga ikki marta aviatashuvlar yo‘lga qo‘yilib, yo‘lovchilar o‘z manzillariga qulay tarzda yetkaziladi. Mo‘ynoq tumanini kompleks rivojlantirish maqsadida hududga Toshkent viloyati biriktirilgan. Ushbu viloyat tadbirkorlari tomonidan Mo‘ynoq tumanida istirohat bog‘i qurilib, qo‘shimcha quvur tortib kelinishi maqsad qilingan.

“STIXIYA”

“STIXIYA” elektron musiqa, san’at va ilm-fan festivali “Fakultet akustiki” MCHJ hamda O‘zbekiston Respublikasi Turizm va madaniy meros vazirligi tomonidan o‘tkazilib kelinmoqda. Ushbu festival ilk bor “Fakultet akustiki” MCHJ tashabbusi bilan 2018 yili Mo‘ynoq tumanida tashkillashtirilgan. Shundan so‘ng yana 2019 va 2021 yili keng miqyosda tashkil etilib kelindi. Bu yili festival 4-marotaba o‘tkazilmoqda va Markaziy Osiyo miqyosdagi noyob madaniy va ko‘ngilochar tadbirga aylanib ulgurdi desak mubolag‘a bo‘lmaydi.

2022 YILDA FESTIVAL DOIRASIDA:

* Sahnalar soni 3ta bo‘ladi (texno, progressiv va etno)

* Musiqachilar soni 5 barobarga ko‘p bo‘ladi

* Mo‘ynoqning rivojlanishiga qaratilgan qo‘shimcha loyihalar ishga tushiriladi

* Festivalga tashrif buyuruvchi mehmonlar soni 2 baravar ko‘payishi kutilmoqda

* Qoraqalpog‘iston va O‘zbekistonning mahalliy san’atkorlari yorqin ifoda etiladi

FESTIVALNING ASOSIY MISSIYASI - MO‘YNOQ SHAHRI VA OROLBO‘YI HUDUDINING RIVOJLANISHIGA KO‘MAKLASHADI

Festivalning vazifalari:

- yurtimizga tashrif buyuruvchi turistlar oqimini oshirish

- ichki turizmni faollashtirish

- hududga bo‘lgan e’tiborni jamlash va muammolarning yechimini topish

- O‘rta Osiyoda noyob bo‘lgan ommaviy tadbirni yaratish.

Qoraqalpog‘iston Respublikasi Turizm va madaniy meros vazirligining Axborot xizmati