SSV: “QISHLOQ SHIFOKORI” DASTURI BO‘YICHA SHIFOKORLARGA 30 MILLION SO‘MDAN PUL MABLAG‘I BERILMOQDA

Chekka hududlarda yashovchi aholiga sifatli tibbiy xizmat ko‘rsatish uzoq yillar sog‘liqni saqlash tizimining eng og‘riqli muammolaridan biri bo‘lib kelgan. Albatta, buning o‘ziga xos bir necha sabablari mavjud. Eng avvalo, bu – sog‘liqni saqlash tizimidagi kadrlar yetishmasligi masalasi bilan bog‘liq. Qolaversa, aksariyat mutaxassis yoki yosh kadr barcha qulaylik va sharoitlar mavjud bo‘lgan joyni tashlab, chekka hududlarda faoliyatini davom ettirishga hamisha ham qiziqish bildirmaydi. Buning uchun esa ularga rag‘bat va imtiyoz tizimi joriy etilishi lozim. Bu borada amalga oshirilayotgan ishlar haqida Sog‘liqni saqlash vazirligi bosh boshqarma boshlig‘i Umidillo RISKIYEV SSV Matbuot xizmatiga so‘zlab berdi:

— Sohadagi ushbu muammoga zarur yechim topish maqsadida Prezidentimizning 2020 yil 12 noyabrdagi “Birlamchi tibbiy-sanitariya yordami muassasalari faoliyatiga mutlaqo yangi mexanizmlarni joriy qilish va sog‘liqni saqlash tizimida olib borilayotgan islohotlar samaradorligini yanada oshirish chora-tadbirlari to‘g‘risida”gi farmoni qabul qilinib, 2021 yildan yurtimizda “Qishloq shifokori” dasturi joriy qilindi.

Shuningdek, davlatimiz rahbarining joriy yil 5 maydagi “Sog‘liqni saqlash tizimida olib borilayotgan islohotlarni izchil davom ettirish va tibbiyot xodimlarining salohiyatini oshirish uchun zarur shart-sharoitlar yaratish to‘g‘risida”gi farmoni bilan tasdiqlangan “Yo‘l xaritasi” 7-bandida olis va chekka hududlardagi shifokorlarga bo‘lgan ehtiyojni qoplash uchun “Qishloq shifokori” dasturini samarali amalga oshirishda 3 ta bosqich ko‘rsatib o‘tilgan:

Birinchisi – shu yil 1 iyungacha olis va chekka hududlardagi shifokorlarga bo‘lgan ehtiyojdan kelib chiqib, bo‘sh shifokor ish o‘rinlari ro‘yxatini tuzish va talabgorlarni har bir mahalla kesimida aniqlash;

Ikkinchisi – 2022 yil 1 avgustgacha “Qishloq shifokori” dasturi doirasida talabgorlar bilan shartnomalar imzolash, ularga uy-joy ajratish va tegishli mablag‘lar to‘lanishini ta’minlash;

Uchinchisi – 2021 yil 1 oktyabr va 2022 yil 1 yanvarda “Qishloq shifokori” dasturi ijrosi yuzasidan Vazirlar Mahkamasiga axborot kiritish.

Prezidentimizning 2020 yil 12 noyabrdagi farmoniga muvofiq, chekka hududlarga borib ishlaydigan tibbiyot xodimlariga bir necha imtiyozlar berilishi ko‘zda tutilgan. Xususan, chekka hududlardagi birlamchi bo‘g‘inga ishga kirgan tibbiyot xodimlariga 30 million so‘m miqdorida bir martalik pul mablag‘i beriladi, ular xizmat uyi bilan ta’minlanadi yoki ijara to‘lovi kompensasiya qilinadi.

Ta’kidlash lozimki, hozirgi kunda yurtimizdagi 243 ta mahalla fuqarolar yig‘inlari olis va chekka hudud sifatida belgilangan. Mazkur xududlarda Respublika bo‘yicha jami 86 ta oilaviy shifokorlik punkti va 39 ta oilaviy poliklinika va ularda 149 ta vakant shtat mavjud.

Ayniqsa, Surxondaryo, Navoiy, Samarqand hamda Farg‘ona viloyatlarining olis hududlarida malakali tibbiyot xodimlariga ehtiyoj katta.

E’tiborlisi, “Qishloq shifokori” dasturi joriy qilinganidan boshlab, bugungi kungacha 41 nafar tibbiyot xodimi 51 stavkaga ishga qabul qilindi. Shu bilan birga, hozircha 16 nafar, ya’ni Navoiy viloyatida – 7 nafar, Surxondaryo viloyatida – 3 nafar, Farg‘ona viloyatida – 4 nafar va Xorazm viloyatida – 2 nafar tibbiyot xodimiga 30 million so‘mdan pul mablag‘i to‘lab berildi.