Shifokor aybi bilan farzand ilinjidagi samarqandlik ayol vafot etdi

Olimov Shuhrat Gaparovichga nisbatan 1-1411-190011/13-sonli jinoyat ishi ochildi.

Olimov Shuhrat Gaparovich (1980 yil 25 fevral kuni Oqoltin tumanida tug‘ilgan, O‘zbekiston fuqarosi, millati o‘zbek, ma’lumoti oliy, oilali, 3 nafar farzandi bor, Oqoltin tumanida joylashgan xususiy korxonasi direktori shifokor) O‘zbekiston Respublikasi Sog‘liqni saqlash vazirligi tomonidan tibbiy faoliyatni amalga oshirish uchun berilgan U-0652-01-sonli lisenziyaga asosan Oqoltin tumani, Loyish shaharchasi, Navro‘z ko‘chasi 35-uyda xususiy korxonasini tashkil qilib, fuqarolarga pullik xizmat ko‘rsatib kelib, lisenziya bitimining 3.2-bandida ko‘rsatilgan “O‘zbekiston Respublikasi Sog‘liqni saqlash vazirligi tomonidan ruxsat etilgan profilaktik diagnostika, davolash standart va metodlarini zararsizlantirish vositalari, reaktivlar va dori darmonlarni qo‘llash” talabini bajarmasdan, fuqaro Sahibova Manzurani “Follikul persistensiyasi, Xayz siklining buzilishi, Menorragiya, Bachadon miomasi, Bachadon bo‘yni polipi, Bepushtlik ikkilamchi, Bo‘qoq 2 daraja, Bachadon naylari o‘tmasligi” tashxisi asosida unga O‘zbekiston Respublikasi Sog‘liqni saqlash vazirligining 2017 yil 27 noyabrdagi “O‘zbekiston Respublikasi sog‘liqni saqlash muassasalarida ginekologik kasalliklarni tashxislash va davolash standartlari”da davolash usuli sifatida kiritilmagan “Gidrotubasiya” amaliyotni bajarish uchun bemor M.Saxibovadan yoki uning yaqin qarindoshlaridan yozma roziligini olmasdan, ya’ni O‘zbekiston Respublikasi “Fuqarolar sog‘lig‘ini saqlash to‘g‘risida”gi qonunning 26moddasida “fuqaroning o‘z kasalligiga doir ma’lumotlarni bilgan holda, o‘z ixtiyori bilan rozilik berishi tibbiy aralashuvning dastlabki zarur shartidir”-deb belgilab qo‘yilgan bo‘lishiga qaramasdan sudlanuvchi SH.Olimov tomonidan ushbu qonun talablari bajarilmasdan, shuningdek M.Sahibovada anafilaktik shokni kelib chiqishini oldini olish uchun profilaktik chora tadbirlarini bajarmasdan, bemordan allergologik anamnez yig‘ilmasdan, dori vositalariga va oziq-ovqat mahsulotlariga allergiyasi bor-yo‘qligini aniqlamasdan, bir nechta dori vositalari aralashmasini bemorga yuborib, ishlatiladigan har bir dori vositasi teri ichiga sinamasi qo‘yilmasdan, M.Sahibovaga “Gidrotubasiya” amaliyot davomida yuborilgan dori vositalari aralashmasidan yuzaga kelgan anafilaktik shokda uning hayotini saqlab qolish uchun yetarli choralarni ko‘rmasdan, kasbi yuzasidan o‘z vazifalarini lozim darajada bajarmaganligi oqibatida M.Sahibova shifoxonada vafot etgan.

“Jahon.uz” ning o‘z manbasi taqdim etgan ma’lumotlarga ko‘ra, Samarqand viloyat sud tibbiyot ekspertiza byurosining 310-sonli xulosasida, marhuma Sahibova Manzurani o‘limi lidokain dori vositasini nojo‘ya ta’siri oqibatida yuzaga kelgan anafilaktik shokdan kelib chiqqan bo‘lishi mumkinligi ko‘rsatilgan. Shuningdek, Samarqand viloyat sud tibbiyot ekspertiza byurosining K-51-sonli komission ekspertiza xulosasida bemor M.Sahibovaning bachadon bo‘shlig‘iga dori vositalari aralashmasi yuborilgandan so‘ng, ahvoli to‘satdan og‘irlashgach, uni zudlik bilan eng yaqinda joylashgan shoshilinch tez yordam ko‘rsatish imkoniyati bo‘lgan tibbiy muassasaga o‘tkazilib yoki xususiy tibbiy muassasaning o‘zida, ahvoli to‘g‘ri baholanib, zaruriy yordam reanimatolog nazoratida olib borilganida, marhumaning hayotini saqlab qolishni ehtimoli mavjudligi ko‘rsatilgan.

Bundan tashqari, SH.Olimov bemor M.Sahibovada “Gidrotubasiya” amaliyotdan so‘ng anafilaktik shok yuzaga kelganida uni hayotini saqlab qolish uchun 1 mg. adrenalinni yurak sohasiga hamda 2 mg. deksemetazon dori vositalarini mushak sohasiga yuborish bilan kifoyalanib, xususiy shifoxonada bemor M.Sahibovaning nomiga yuritilgan 8661-sonli ambulator tibbiy kartasiga M.Sahibovaga shoshilinch yordam ko‘rsatish maqsadida uning vena qon tomirlariga deksametazon 12 mg, dimedrol 1,0 ml, adrenalin 0,1%-1,0 ml., natriy xlor 400 ml. dori vositalari yuborilganligi to‘g‘risida soxta ma’lumotlarni kiritgan.

Olimov Shuxrat taxminan 2013 yilda Sahibova Manzura farzandlik bo‘lolmayotganligini aytib u ishlaydigan “Olimov Shuxrat Gaparovich” xususiy korxonasiga qabuliga kelganligi, u uni muqaddam davolashi natijasida 2014 yilda farzandli bo‘lganligi, shundan so‘ng M.Sahibova yana kelib bachadon naylari yopiqligini, yana farzandli bo‘lmayotganligini aytganligi, shundan so‘ng keyingi xayzning 7-8 kunlariga kelib bachadon naylarini tekshirib ko‘rib, agar bachadon naylari yopiq bo‘lsa “Gidrotubasiya” ya’ni bachadon naylarini ochamiz deb aytib, uyiga javob berganligini aytgan.

Sud ushbu jinoyat ishini hamma tomonlama o‘rganib, Sudlanuvchi Olimov Shuxrat Gaparovich O‘zbekiston Respublikasi Jinoyat kodeksining 116-moddasi 3-qismi va 228-moddasi 1-qismida nazarda tutilgan jinoyatlarni sodir qilganlikda aybdor deb topdi va unga, O‘zbekiston Respublikasi Jinoyat kodeksining 116-moddasi 3-qismi  bilan, JKning 45-moddasini qo‘llab, 2 (ikki) yil muddatga muayyan huquqdan, ya’ni tibbiyot sohasida mansabdorlik va moddiy javobgarlik lavozimlarida ishlash huquqidan mahrum qilib, 2 (ikki) yil muddatga ozodlikdan mahrum qilish jazosi tayinladi.