Sanoat, radiasiya va yadro xavfsizligi qo‘mitasi tashkil etiladi
![Sanoat, radiasiya va yadro xavfsizligi qo‘mitasi tashkil etiladi Sanoat, radiasiya va yadro xavfsizligi qo‘mitasi tashkil etiladi](/photos/news/nwOyD7Dk4KOHmiJ.jpeg)
O‘zbekiston Respublikasi Prezidentining shu yil 24 maydagi “Er qa’ridan foydalanish, sanoat, radiasiya va yadro xavfsizligi hamda atom energiyasidan foydalanish sohalarida davlat boshqaruvi va nazorati tizimini takomillashtirish chora-tadbirlari to‘g‘risida”gi farmoniga ko‘ra, Vazirlar Mahkamasi huzurida Sanoat, radiasiya va yadro xavfsizligi qo‘mitasi tashkil etiladi. Bu haqida O‘zbekiston milliy axborot agentligi — UzA xabar bermoqda.
Qo‘mita Konchilik sanoati va geologiya vazirligi huzuridagi Kon-geologik va sanoat xavfsizligini nazorat qilish inspeksiyasi negizida tuziladi. Inspeksiyaning o‘zi konchilik sanoati va geologiya nazorati inspeksiyasi etib qayta tashkil etilmoqda.
Qo‘mita yadro energiyasi va yadro texnologiyalari ob’ektlarida radiasiya va yadro xavfsizligini ta’minlash, shuningdek, xavfli ishlab chiqarish ob’ektlarida sanoat xavfsizligi sohalarida yagona davlat siyosatini amalga oshirish va muvofiqlashtirish bo‘yicha vakolatli respublika ijro etuvchi hokimiyat organi hisoblanadi. Qo‘mitaga yoqilg‘i quyish shoxobchalari, neft va gazni birlamchi qayta ishlash, magistral quvurlar va gaz inshootlari xavfsizligini ta’minlash, donni saqlashda sanoat xavfsizligi nazorat qilish, istirohat bog‘lari faoliyatini nazorat qilish va boshqa funksiyalar berilgan.
Qo‘mita tarkibida yuridik shaxs tashkil etmagan holda davlat byudjetidan moliyalashtiriladigan Radiasiya va yadro xavfsizligi departamenti tashkil etilmoqda. Shuningdek, davlat organi shaklidagi Radiasiya va yadro xavfsizligi bo‘yicha ilmiy-texnika markazi ham bo‘ladi.
Sanoat, radiasiya va yadro xavfsizligi talablariga rioya etmagan holda olib borilayotgan yoki baxtsiz hodisa va avariya sodir bo‘lishiga olib kelishi mumkin bo‘lgan ishlarni to‘xtatib turish, shuningdek, odamlar hayoti xavf ostida qolganda ularni ish joylaridan olib chiqish, o‘z vakolatlari doirasida qonunchilik va texnik jihatdan tartibga solish sohasidagi normativ hujjatlar talablarini buzganlik uchun tashkilotlarning mansabdor shaxslari va jismoniy shaxslarni ma’muriy javobgarlikka tortish to‘g‘risida qarorlar qabul qiladi.
Qo‘mitaning respublika hududlarida qurilayotgan va foydalanilayotgan atom energiyasidan foydalanish ob’ektlari holatining doimiy nazoratini ta’minlovchi xodimlarining joylashuvi bevosita mazkur ob’ektlarda amalga oshiriladi. Qo‘mita huzurida yuridik shaxs maqomiga ega bo‘lmagan, byudjetdan tashqari sanoat xavfsizligi sohasini qo‘llab-quvvatlash jamg‘armasi tashkil etildi.
Jamg‘arma sanoat, radiasiya va yadro xavfsizligi sohasida davlat xizmatlarini ko‘rsatishdan qonunchilikda belgilangan tartibda va miqdorlarda qo‘mitaga tushadigan, qo‘mita tomonidan xo‘jalik yurituvchi sub’ektlar, ularning mansabdor shaxslari va jismoniy shaxslardan sanoat, radiasiya va yadro xavfsizligi sohasidagi qonunchilik hamda texnik jihatdan tartibga solish sohasidagi normativ hujjatlar talablarini buzganlik uchun qonunchilikda belgilangan tartibda va miqdorlarda undiriladigan jarimalar summasining 40 foizi miqdoridagi mablag‘lar hisobidan moliyalashtiriladi.
Shuningdek, Qo‘mitaga Energetika vazirligi, Tog‘-kon sanoati va geologiya vazirligi hamda Atom energiyasi agentligi bilan birgalikda 2025 yil 1 sentyabrga qadar respublikada atom energetikasining rivojlanish darajasi va xalqaro normalardan kelib chiqib, departamentning shtat birliklari sonini oshirish to‘g‘risidagi asoslangan takliflarni Vazirlar Mahkamasiga kiritish topshirildi.
2024 yil 1 dekabrga qadar xalqaro moliya institutlari va konsalting kompaniyalarini to‘g‘ridan-to‘g‘ri jalb qilgan holda Qo‘mita faoliyatini rivojlangan davlatlarning sanoat, radiasiya va yadro xavfsizligi, liftlar va istirohat bog‘lari attraksionlari xavfsizligini nazorat qilish sohasidagi ilg‘or tajribasi asosida takomillashtirish bo‘yicha takliflarni tayyorlash topshirildi.