Samarqandda kafe egasiga bakal otib, jarohatlagan xo‘randa ayol 3 yilga qamaldi

Ayol kafega tug‘ilgan kunini nishonlash uchun borib, hisob-kitob vaqtida janjal yuzaga kelgan.

Ma’lum qilinishicha, Samarqandda ayol turmush o‘rtog‘i va bir nechta sheriklari bilan tug‘ilgan kunini nishonlash uchun kafega borgan. Hisob-kitobga kelganda, oshxona egalari va xo‘randalar o‘rtasida janjal kelib chiqqan. Natijada ayol oshxona egasining boshiga shisha idishi bilan urib, jarohat yetkazgan. Ushbu janjal aks etgan holat oshxonadagi kuzatuv kamerasiga muhrlangan.

“Kutilmagan holda miyamga urdi. Avval mushti bilan keyin bakal bilan urdi. Men nafas ololmay qoldim. Ular tarelka, bakal hamma narsani bizga qarab otdi”,- deya izohladi jabrlanuvchi.

Samarqand telekanalining xabar qilishicha, ushbu holat JIB Samarqand shahar sudining sayyor sud majlisida muhokama qilingan. Sud jarayonida prokuror ayolga 5 yil muddatga ozodlikdan mahrum qilish jazosini so‘radi.

Sud hukmiga ko‘ra, ayol JKning 104-moddasi 2- qismi "e" bandida nazarda tutilgan jinoyatni sodir etganlikda aybli deb topilib, JKning 57-moddasini qo‘llab, unga 3 yil muddatga ozodlikdan mahrum qilish jazosi tayinlandi.