Saida Mirziyoyeva: "O‘zbekiston to‘xtab qolmaydi. Biz endigina boshladik"

O‘zbekiston masshtabli o‘zgarishlarning endigina boshida turibdi. Prezident administrasiyasi rahbari Saida Mirziyoyeva Alter Ego loyihasiga bergan intervyusida shu haqda aytib o‘tdi.

O‘zbekiston islohotlar cho‘qqisiga chiqdimi yoki bir joyda to‘xtab qoldimi, degan savolga Saida Mirziyoyeva bunday yondashuvni rad etdi: «Qo‘ysangiz-chi. Menimcha, hech qachon to‘xtab qolish bo‘lmaydi. Biz endigina boshladik».

«Ishlarni yo‘lga qo‘ydik va oz bo‘lsa-da, qandaydir yengillikni his qila boshladik. Biznes qilish ancha osonlashdi», — dedi u.

Shu bilan birga, u muammolar hali ham ko‘pligini, ayniqsa, hududlarda qiyinchiliklar borligini ta’kidladi: «Men viloyatlarga boraman, juda ko‘p qiyinchiliklar borligini ko‘raman. Ha, muammolar juda ko‘p, davlatning imkoniyatlari esa kichik. To‘g‘ri tushuning, biz imkoniyatlari cheklangan mamlakatmiz».

«Chekilangan imkoniyatlar» deganda nimani nazarda tutganini izohlar ekan, Saida Mirziyoyeva geografik, moliyaviy va infratuzilmaviy omillarni sanab o‘tdi.

«Dengizga chiqishimiz uchun ikkita mamlakatni bosib o‘tish kerak… Pulsiz hech narsani hal qilib bo‘lmaydi. Hamma narsa — pul», — dedi u.

Uning so‘zlariga ko‘ra, mamlakatdagi infratuzilma ancha eskirgan. «Bu nafaqat O‘zbekistonning, balki butun postsovet hududining muammosi, deb o‘ylayman. Infratuzilma sovet davridan — 70, 60, 50-yillardan qolib ketgan. Bularning barchasini isloh qilish uchun katta, juda katta mablag‘ kerak. Biz bosqichma-bosqich ketyapmiz».

Suv — eng asosiy ustuvor vazifa

Saida Mirziyoyeva Prezident administrasiyasida beshta ustuvor yo‘nalish belgilab olinganini aytdi. Eng asosiy ustuvor vazifa — suv.

Uning qayd etishicha, bu mamlakat uchun «yaqin kelajakdagi» jiddiy muammo, garchi bu haqda omma oldida ko‘p gapirilmasa ham.

«E’tibor kam qaratilyapti, deb bo‘lmaydi. Biz bu haqda kam gapiryapmiz, shekilli. Mana shu yerda biz biroz oqsayapmiz. Lekin aslida bu — administrasiyamiz diqqat markazidagi eng asosiy masalalardan biri».

Boshqa ustuvor yo‘nalishlar qatorida u ta’lim, tibbiyot, biznes va sud tizimini sanab o‘tdi: «Shaffof va adolatli sud tizimisiz bularning hech biriga erishib bo‘lmaydi».

«Men bu yerda «xo‘jako‘rsin»ga o‘tirganim yo‘q»

Islohotlarga bo‘layotgan qarshiliklar va joylardagi haqiqiy ahvoldan qanchalik xabardor ekani so‘ralganda, Saida Mirziyoyeva bu borada jamoasi va ma’lumotlarni tekshirish tizimiga suyanishini aytdi.

«Men doim aytaman: bolalar, men bu yerda «xo‘jako‘rsin»ga yoki chiroyli gaplar gapirish uchun o‘tirganim yo‘q. Bu yerda, administrasiyada real vaziyatni bilish uchun o‘tiribman», — dedi u.

U ma’lumotni buzib ko‘rsatishga urinishlarni ma’nisiz ish deb atadi. «Nimaga? Bundan nima ma’no? Men baribir bilib olaman. Baribir haqiqatning tagiga yetaman… Agar biror kishi hisobot bersa, menda, albatta, ikkinchi tomon ham bor. Menda razvedka juda zo‘r ishlaydi».

«Har bir keys — tizimni yaxshilash uchun imkoniyat»

Ko‘p masalalarni hal qilish uchun shaxsan aralashish talab etilayotgani haqidagi vaziyatga izoh berar ekan, Saida Mirziyoyeva buni ish jarayoni sifatida qabul qilishini aytdi.

«Biz ishlashimiz kerak… Hozir vaziyat shunaqa, ertaga boshqacha bo‘ladi va so‘zsiz yaxshiroq bo‘ladi, chunki biz bu ishni yo‘lga qo‘yamiz».

Aytishicha, har bir konkret holatga uning jamoasi «tizimni tartibga solish imkoniyati» sifatida qaraydi.

Administrasiya rahbari turli sohalardagi muammolar — sud tizimidan tortib biznes, ta’lim va gender masalalarigacha — bir-biri bilan chambarchas bog‘liq ekanini ta’kidladi.

«Menga xalqaro diplomatiya yoqadi»

Saida Mirziyoyeva o‘zi uchun nima bilan shug‘ullanish eng qiziq ekani haqida gapirar ekan, uni eng ko‘p xalqaro diplomatiya o‘ziga tortishini aytdi.

«Men bir umr, bolaligimdan diplomat bo‘lishni orzu qilganman. Odamlar bilan muloqot qilish, aloqalarni yo‘lga qo‘yish — bu mening qo‘limdan eng yaxshi keladigan ish. Bu talant bo‘lsa kerak».

Shu bilan birga, u ishning katta qismi «komfort zona»dan chiqishni talab qilishini qayd etdi: «Men doim komfort zonadan chiqaman. Qayerda o‘zimni qulay his qilsam, o‘sha yer menga noqulay tuyiladi. Qayerda ichki qarshilikni his qilsam, demak, o‘sha yerda o‘syapman».

«Men turli ideologiya va hikmatlarni xush ko‘raman. Juda ko‘p o‘qiyman va o‘zimning, aytaylik, qat’iy dogmalarimga amal qilaman. Bu — proaktiv yashash degani. Hayotning mazmuni — ezgulik ulashishda. Ya’ni agar sen bu dunyoga keldingmi, senda ma’lum xislatlar va imkoniyatlar bormi, vazifang — faqat berish, berish va yana berishdan iborat bo‘lishi kerak. Shunda o‘rtada uzviy bog‘liqlik, tabiiy aylanish hosil bo‘ladi».

U proaktiv yondashuvni eng muhim deb atadi: «Proaktivlik — bu muammoni ko‘rganingda, uni shunchaki muammo emas, balki imkoniyat deb bilishingdir».