Rossiyada Superjet’lar parvozi to‘xtashi mumkin

Rossiyada SaM146 rus-fransuz dvigatellarida qo‘llaniladigan, AQShdan olib kelinadigan o‘t oldirish svechalari yetishmasligi sababli Superjet 100 (SSJ100) reyslari to‘xtab qolishi mumkin, deb xabar berdi RBK 17 mart, juma kuni bunday samolyotlardan foydalanadigan oltita aviakompaniya xodimlariga tayanib. Avvalroq shunga o‘xshash ma’lumotlar Telegram-kanallarida paydo bo‘lgan edi.

RBK ma’lumotlariga ko‘ra, Amerika svechalari taqchilligi Rossiyaning Ukrainaga qurolli bostirib kirishi sababli G‘arb tomonidan kiritilgan sanksiyalar fonida Rossiyaga yetkazib berish to‘xtatilganidan keyin yuzaga kelgan. «IrAero» bosh direktorining birinchi o‘rinbosari Vladimir Panfilovning 16 fevral kuni Sanoat va savdo vazirligiga yo‘llagan maktubida aytilishicha, Superjet parkining bir qismi «yaqin kelajakda» parvozlarni bosqichma-bosqich to‘liq to‘xtatishi mumkin. «IrAero» bosh direktori Yuriy Lapinning aytishicha, hozirda hammasi joyida, bir nechta zaxira svechalar bor, shuning uchun parvozlar intensivligi pasaymayapti. Shu bilan birga, u kelajakda muammolar bo‘lishi mumkinligini tasdiqladi.

Bozorda yangi o‘t oldirish svechalarining jiddiy taqchilligini «Azimut» aviakompaniyasi direktorlar kengashi raisi Pavel Udod va «Yakutiya» aviakompaniyasidagi ikkita manba ham tasdiqladi.

SSJ100’ning faoliyat ko‘rsatishdan to‘xtatish ehtimoli haqida fransuz dvigatel ishlab chiqaruvchi SaM146 - Safran Rossiyadan ketganidan keyin xabar berila boshlandi. Dvigatellarni mahalliy PD-8 bilan almashtirish, shu jumladan turbinalar narxi butun samolyotning qoldiq qiymati bilan taqqoslanadi yoki undan ham qimmatga tushadi, deb tan oldi Yuriy Slyusar, Birlashgan aviasiya korporasiyasi (BAK) rahbari.

Import qilinadigan ehtiyot qismlariga yuqori qaramlik tufayli samolyotlarni ta’mirlash mumkin emas. O‘tgan yilning o‘rtalaridan boshlab Rossiyada avariyalar va samolyotlarning nosozliklari soni ko‘paydi va yanvar oyida ular deyarli har kuni ommaga e’lon qilindi.

«Rostex» 2023 yildan boshlab rus svechalarini yetkazib berishni boshlashga va’da berdi.