Rossiya AQSh va Xitoy qatoriga qo‘shilib, Afrikadagi birinchi harbiy-dengiz bazasi uchun joy belgiladi

Rossiya Afrikada o‘zining birinchi harbiy-dengiz bazasini tashkil etish rejalarini yakunlab, AQSh va Xitoy kabi jahon kuchlari safida o‘z o‘rnini mustahkamladi.

Sudan hukumati mamlakatning Qizil dengiz sohilida Rossiya harbiy-dengiz bazasi qurilishi bo‘yicha uzoq vaqtdan beri kechiktirilgan kelishuvni tasdiqladi va uni amalga oshirishda hech qanday to‘siq qolmaganini ma’lum qildi.

Rossiyaning Sudanda harbiy-dengiz bazasini tashkil etish qarorining zamirida strategik, harbiy va iqtisodiy manfaatlar yotadi. Bu qaror Rossiyaning Afrikadagi ta’sirini kengaytirish va dunyo miqyosidagi harbiy mavqeini mustahkamlash bo‘yicha keng qamrovli sa’y-harakatlarini aks ettiradi.

Agar reja muvaffaqiyatli amalga oshirilsa, bu Rossiyaning qit’adagi birinchi doimiy harbiy-dengiz bazasi bo‘lib, unga geosiyosiy ahamiyati tobora ortib borayotgan mintaqada muhim ishtirok etish imkonini beradi.

Baza Rossiya harbiy kemalari, shu jumladan, yadroviy quvvatli kemalar uchun asosiy logistika markaziga aylanishi va Rossiyaning Qizil dengiz hamda undan tashqaridagi harbiy-dengiz salohiyatini oshirishi kutilmoqda.

Sudan tashqi ishlar vaziri Ali Yusufning aytishicha, Rossiya bilan yakuniy kelishuv imzolangan va ikkala tomon ham port qurilishi masalasida «to‘liq hamfikr.»

U yana shuni ta’kidladiki, kelishuvni ratifikasiya qilishdan boshqa qadam qolmagan, undan so‘ng qurilish va faoliyat rejalarini amalga oshirish mumkin bo‘ladi.

Bu portning barpo etilishi Rossiyaning strategik yo‘nalishini o‘zgartirayotganini ko‘rsatadi, ayniqsa so‘nggi geosiyosiy o‘zgarishlar, jumladan Suriyadagi harbiy ob’ektlarini yo‘qotgani nuqtai nazaridan.

Jahon kuchlari o‘rtasidagi raqobat kuchayib borayotgan bir paytda, Rossiyaning bu harakati uning Afrikaning o‘zgarib borayotgan xavfsizlik va iqtisodiy maydonida barqaror o‘rin egallashga intilayotganini namoyon etmoqda.