Nyu-Yorkda Donald Tramp tug‘ilgan uy 2,3 million dollarga sotuvga qo‘yildi

Nyu-York shahrida AQShning sobiq prezidenti Donald Tramp hayotining ilk yillarini o‘tkazgan uy sotuvga qo‘yildi. Bu uy Queens tumanidagi Jamaica Estates hududida joylashgan bo‘lib, 1940 yilda Trampning otasi Fred Tramp tomonidan qurilgan. Donald Tramp bu yerda 1946 yil 14 iyunda tug‘ilganidan to‘rt yoshgacha yashagan.

Mazkur uy bir necha bor egasini o‘zgartirgan. 2016 yilgi prezidentlik saylovlari arafasida investor Maykl Devis uni 1,39 million dollarga sotib olgan va bir yil o‘tib uni 2,14 million dollarga xitoylik ayolga qayta sotgan.

Bir necha yil davomida bo‘sh turgan va, qo‘shnilarning aytishicha, 30 tacha ko‘cha mushuklari yashagan uy keyinchalik developer Tommi Lin tomonidan sotib olingan. U bino fasadini va qadimiy pechini saqlab qolgan holda to‘liq restavrasiya qilgan hamda zamonaviy texnika bilan jihozlagan.

Endilikda 232 kvadrat metr maydonga ega yangilangan uy yana sotuvga qo‘yildi. Narxi — 2,3 million dollar yoki taxminan 1,98 million yevro.