Namangandagi 2 ta tumanda qimorxona tashkil qilganlar va qimorbozlar ushlandi

Namangan viloyati Norin tumani IIB xodimlari tomonidan olib borilgan surishtiruv ishlari natijasida Uchqo‘rg‘on tumanida yashovchi bir nechta fuqarolar Norin tumani Norinkapa mahallasidagi dalada tavakkalchilikka asoslangan xo‘roz o‘yinlarini tashkil etib, qonunga qarshi chiqishgan.

Ular ushbu dala maydonida bir necha fuqarolardan pul yig‘ib, qimorxona tashkil etishgan. Mazkur joyda qonunbuzarlar holislar ishtirokida qo‘lga olindi.Tergovga qadar tekshiruv davomida o‘yinda ishtirok etgan shaxslarga tegishli bo‘lgan xo‘rozlar va o‘yinga tikilgan pullar daliliy ashyo sifatida rasmiylashtirilgan.

Ushbu fuqarolarga nisbatan Norin tumani IIB Tergov bo‘limi tomonidan O‘zbekiston Respublikasi Jinoyat Kodeksining 278-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Huddi shunday holat Namangan tumanida ham aniqlandi. Ushbu tumanda yashovchi 43 yoshli fuqaro yashash xonadonida qonunga hilof ravishda qimor o‘yinlari tashkil etib kelgan.

Tuman IIB xodimlari bu uyni ko‘zdan kechirish uchun borishganida ushbu xonadonda 6 nafar fuqaro va uy egasi haqiqatan qimor o‘ynab o‘tirgani aniqlangan. Holislar guvohligida qimorxonadagi kartalar va o‘yinga tikilgan pullar daliliy ashyo sifatida rasmiylashtirildi.

Hozirda Namangan tumani IIB huzuridagi Tergov bo‘limi omonidan ushbu fuqarolarga nisbatan O‘zbekiston Respublikasi Jinoyat Kodeksining 278-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.