Namanganda 23 yoshli yigitga hukm o‘qildi

Barchamiz bolaligimizdan biladigan bir hikoyat bor. Qo‘shnining uyidan tuxum o‘g‘irlab chiqqan bolani qo‘lidagini olgan onasi uni erkalab o‘pib qo‘yadi. Aslida qo‘llab-quvvatlamagan, lekin jiddiy chora ham ko‘rmagan. Oradan vaqt o‘tib tuxum ikkitaga ko‘paygan. Keyin yana kattaroq narsa tarbiyani tepkilab xo‘jalikka kirib keladi. Bora-bora qusur ildiz olib, odat, ko‘nikmaga aylanadi. Shu qadarki, bola o‘rgangan “hunar”isiz turolmaydigan bo‘ladi. Bu nopok yo‘l uni dor tagiga olib kelganda uning ko‘zi ochiladi va so‘nggi tilak sifatida onasi bilan ko‘rishadi. Farzandining aftoda holidan bo‘zlab turgan onaizor bolasi tomonidan qattiq jazolanadi.

Hayotiy kuzatuvlar o‘g‘irlik illatini birdan paydo bo‘lmasligini isbotlaydi. Oiladagi muhit, tarbiya uni shakllantiradi.bepisandlik, loqaydlik rivoj toptiradi. Oxir-oqibat...

Namangan viloyatidagi o‘g‘irlik jinoyati ayni kuch-quvvatga to‘lgan, kattalarimiz ta’biri bilan aytganda, “tog‘ni talqon qiladigan” yigit tomonidan sodir etildi. 23 yoshli Safayev Umar (ism shariflar shartli) avval ham o‘g‘irlik qilib sudlangan. O‘shanda unga pushaymonligi, oilaviy sharoiti, yoshligi, muqaddam sudlanmaganligi kabi bir qator asoslar bilan ishonch bildirilib, to‘g‘ri yo‘lga o‘tib olishi uchun imkon berilgan edi. Sud 2 yilu 6 oy muddatga ahloq tuzatish ishlari jazosi tayinlagandi. Ammo oradan 4 oygina muddat o‘tib Umar yana jinoyatga qo‘l urdi. Qizig‘i shundaki, u o‘g‘irlik jinoyatini firibgarlik bilan ham amalga oshirar, goh aldov, goh yashirin tarzda kishilarni qaqshatib, mulkini talon-toroj qilardi.

Namangan shahridagi “MEN-55” savdo majmuasiga g‘araz niyat bilan kirgan U. Safayev 420.000 so‘mlik erkaklar sport kiyimi, 380.000 so‘mlik “Nike” nomli erkaklar sport oyoq kiyimini olib sotuvchining oldiga keladi. Go‘yo sherigini kutayotgan kishi bo‘lib betoqatlanib tashqari chiqib kelaveradi va oxiri sotuvchiga yuzlanib, “Sherigim sartaroshga kirgandi, navbatda turib qoldi chog‘i, shunday shuni ko‘rsatib kelay , maylimi?..”, - deya ishonchiga kiradi. Do‘kon safida salgina narida bo‘lgan sartaroshxonadan zumda chiqar degan xayoldami yoki o‘ta ishonib ketgani uchunmi sotuvchi ruxsat berib yuboradi va mollar ham, “xaridor” ham izsiz yo‘qoladi.

O‘z qilmishini fosh bo‘lmasligiga ishonganidanmi yoinki, qlayotgan ishi, kelayotgan tekin daromad zavq berganmi, Umar jinoiy yo‘lida davom etadi. U shahardag 15-sonli maktabda qorovul bo‘lib ishlovchi Shokir Usarovga, nufuzli joyda ishlashi, uni tuzukroq ishga joylab qo‘yishi mumkinligini aytib bir-ikki suhbatlar qilib boradi. Buning uchun uning pasporti lozimligini aytib ishonchiga kiradi va SH. Usarovga tegishli pasportni olib, uning 4.000.000 so‘m qiymatga ega bo‘lgan “ASUS” nomli noutbugini kinolarni ko‘chirib olish bahonasida olib izsiz yo‘qoladi.

Yo‘lida davom etgan U. Safayev “YURA” savdo do‘koniga borib sotuvchining ishonchiga kirib, fuqaro SH.Usarovga tegishli bo‘lgan pasportni o‘ziniki deb berib (shu qadar ishonishganki, pasportni ochib ko‘rishmagan) 475.000 so‘mlik kiyim-kechaklarni olib chiqib ketgan.

Bundan tashqari Umar bir necha kishini qimmatbaho qo‘l telefonlarini gaplashib olish uchun olib, firibgarlik bilan qo‘lga kiritib olib qochib ketib talon-toroj qilib yuborgan.

Shuningdek, u xususiy do‘konlardan biriga g‘ayritabiiy ravishda kirib, hech kim yo‘qligidan foydalanib u yerda bo‘lgan 3.500.000 so‘mlik muzlatgich, 22.000.000 so‘mlik muzqaymoq tayyorlash apparatini olib chiqib ketgan.

U. Safayevning kirdikorlari bular bilan tugamagan. Namangan shahridagi “Kamaro” hamda “Azizi” mahallalaridagi kompyuter o‘yinlari majmuasiga kirib 5.580.000 so‘mlik bo‘lgan “Play station -4” o‘yin moslamalari (2dona) barcha komplektlari bilan hayritabiiy ravishda olib chiqib ketgan.

To‘g‘ri yo‘ldan toyilib o‘zini yetuk shaxs, komil inson ekanligini unutgan U. Safayevning kirdikorlariga barham berildi. Albatta-da, qay bir jinoyat izsiz ketibdi-ki bu o‘zgalarning mol-mulki xisobiga kun ko‘rib, tekin daromad topib yuraversa. Qolaversa o‘zganing haqqi aslo osh bo‘lmasligi ham bor gap.

Sud bu gal U. Safayevga jiddiy jazo turi belgiladi. Uning qilmishlarini adolat tarozisiga solib, 6 yil 6 oy ozodlikdan mahrum qilishga hukm o‘qildi.

23 yoshlik farzandlarimiz, nufuzli joylarda rahbar, mutaxassis, fermer, katta tadbirkor, jaxon sport arenalarida yulduz.

Tarbiyaning noqisligi, farzand kamoliga e’tiborsizlik bugun bir 23 yoshlik yigitning umriga zomin bo‘lib turibdi. U ham aslida yuqoridagi kabi faxr-iftixor soxiblari safida bo‘lishi mumkin edi! Afsus...

Xulosa xar bir shaxsning o‘zida. Jamiyat a’zolari safiga bitta ilmi komil, ma’nan, ruhan va jismonan yetuk shaxsni qo‘shish har birimiz uchun ham ezgu maqsad, shunday emasmi?..

Shu maqsadimiz rivoji yo‘lida nafaqat o‘zimiz, atrofimizdagilar taqdiriga ham bepisand bo‘lishdan saqlanaylik. Zotan, yurtning har bir farzandi – bizning farzandimiz.

Jamshidbek Mamurov,

Namangan viloyat sudi sudyasi