"Men baxtliman!" – Prezident taqdirlagan 27 yoshli tadbirkor ayol haqida

22 avgust kuni prezident Shavkat Mirziyoyev tadbirkorlar bilan ochiq muloqot o‘tkazdi. Muloqot chog‘ida tadbirkorlar uchun qator o‘zgarishlar bo‘lishini e’lon qildi.

Qashqadaryo viloyatining eng chekka tumanlaridan biri — Dehqonobodda faoliyat yurituvchi tadbirkor 27 yoshli Feruza Norsafarova prezidentning tadbirkorlarga yaratib berayotgan imkoniyatlaridan ilhomlanib, bu boradagi fikrlarini «Daryo» bilan bo‘lishdi.

Prezident uchrashuv shaxsan men uchun uzoq kutilgan va orzumni amalga oshirishimga imkon beruvchi uchrashuvlardan biri bo‘ldi. Shaxsan davlat rahbarining o‘zi biz tadbirkorlar muammosi bilan qiziqayotgani, bizga imokoniyat berayotgani quvonarli hol. Va tanlagan yo‘limizdan har qancha faxrlanishimizga arzirlik voqea desak, xato qilmagan bo‘laman.

Bilasizmi, dadam ham tadbirkor bo‘lgani uchun yoshligimdan tadbirkorlik nonini yedim. Imkon qadar ko‘proq daromad topib, tadbirkorligimizni rivojlantirish yo‘llarini izladim. 24 yoshimdayoq davlat rahbarining qo‘llab-quvvatlovi bilan dadamning biznesidan alohida biznesimni yo‘lga qo‘ydim. Milliardlab mablag‘im bor, qo‘l ostimda 31 nafar xodim faoliyat yuritadi. Kechagi uchrashuv va davlat rahbari yaratib berayotgan imkoniyat sabab esa endi biznesimni ikki karra rivojlantiraman, — deydi dehqonobodlik tadbirkor Feruza Norsafarova.

Feruza Norsafarova davlat rahbarining tadbirkorlik korxonalarini toifalarga ajratib, ularni qo‘llab-quvvatlashga harakat qilayotgani u uchun ayni muddao bo‘lganini aytmoqda.

Kecha tadbirkorlik korxonalari toifalarga ajratilib, ularni qo‘llab-quvvatlash bo‘yicha alohida yondashuvlar belgilanishi e’lon qilindi. 1 milliard so‘mgacha bo‘lgani — mikrobiznes bo‘lsa, 10 milliard so‘mgacha bo‘lgani — kichik biznes, 100 milliard so‘mgacha bo‘lgani o‘rta biznes sifatida talqin qilinib, tadbirkorlarga yengilliklar berilmoqda. Mikrobiznes uchun yagona soliq stavkasi 2023 yil 1 yanvardan boshlab mikrobiznes uchun aylanmadan olinadigan soliqning amaldagi 4 foizdan 25 foizgacha bo‘lgan soliq stavkalari o‘rniga, yagona 4 foizli soliq stavkasi joriy etilmoqda. Olis hududlardagi va alohida toifadagi tadbirkorlar uchun amaldagi 1 va 2 foizli stavkalar saqlab qolinar ekan. Oldingi tartib bo‘yicha, «oboroti» bir yilda 100 million so‘m bo‘lgan tadbirkor 4 million so‘mdan 25 million so‘mgacha soliq to‘lagan bo‘lsa, endi esa yagona stavka — 4 million so‘m to‘laydi. Bu savdo aylanmasi miqdoridan kelib chiqib, o‘zgarishi mumkin. Ya’ni, masalan, 1 milliard so‘m aylanmaga ega bo‘lganlar 250 million o‘rniga 40 million to‘laydi. Xo‘sh, bundan ortiq bizga yana nima kerak? Faqat ishlash va mehnat qilish qoldi», — deydi tadbirkor.

Tadbirkorning fikricha, yangiliklar sabab endilikda tadbirkor va soliqchi qalin do‘st bo‘ladi.

Yana bir quvonchli jihati, tarbirkor o‘z xohishi bilan 20-30 million so‘m soliq to‘lasa, buxgalteriya hisobini yuritish va o‘sha hisobotni soliq idoralariga yuborishi shart bo‘lmaydi. Bu orqali tadbirkor, birinchidan, 40 milliondan kamroq soliq to‘laydi, ikkinchidan qog‘ozbozlikdan ozod bo‘ladi. Hozirgi mavjud soliq solish tartibi mantiqqa zid edi. Tadbirkorlarni kamroq aylanma qilishga, natijada kamroq pul topishga majburlardi. Natijada tadbirkorlar birovlarning nomiga soxta yuridik shaxslar ochib, soliqdan chegirib qolishga urinishadi, yoki norasmiy ishlashga, naqd pulda oldi-berdi qilishga o‘tib ketishadi. Yangi tartib tadbirkorlar uchun xotirjam ishlashga, soliq yukidan cho‘chimaslikka imkoniyat beradi. Natijada esa hamma — ham biznes, ham davlat yutib chiqadi. Tadbirkor va soliqchi qalin do‘st bo‘ladi, — deydi tadbirkor ayol.

Tadbirkor kelajakda aynan prezidentdan «O‘zbekistonda xizmat ko‘rsatgan tadbirkor» unvonini olish niyati borligini aytmoqda.

Shu yurtda tug‘ilganimdan, aynan O‘zbekistonda tadbirkorlik qilayotganimdan judayam mamnunman. To‘g‘ri, kim uchundir bu balandparvoz gap bo‘lib tuyular, ammo ishoning, prezidentimiz yaratib berayotgan imkoniyat sabab men va men kabi tadbirkorlar soatiga boyib boryapmiz. Kechagi imkoniyat esa hammasidan zo‘ri bo‘ldi. Xullas, bir gap bilan aytganda, men baxtliman va yanayam baxtli bo‘lish uchun menda barcha imkoniyatlar bor. Ishontirib aytamanki, kelajakda aynan prezidentimizdan «O‘zbekistonda xizmat ko‘rsatgan tadbirkor» unvonini ham olaman, — deydi u.