Mask ruslarga ma’lumot uzatganlikda gumonlanmoqda

Amerika hokimiyati Ilon Mask ishtirokida tashkil etilgan AQSh hukumatining samaradorlik departamenti (DOGE) aloqador bo‘lishi mumkin bo‘lgan maxfiy ma’lumotlarning sizib chiqish ehtimolini tekshirmoqda.

Bu haqda NPR hukumatdagi manbalarga asoslanib xabar bermoqda.

Nashr ma’lumotlariga ko‘ra, AQSh Mehnat munosabatlari bo‘yicha milliy kengashi xodimlari departament xarajatlar tekshiruvi bahonasida ularning ma’lumotlar bazalariga kirganidan, so‘ngra esa ma’lumotlarni uchinchi tomonlarga - xususan, Rossiya tuzilmalariga uzatgan bo‘lishi mumkinligidan shubhalanishgan.

Mart oyida DOGE jamoasi byudjetni optimallashtirish maqsadida agentlikni tekshirdi. Buning uchun xodimlar kasaba uyushmalari faoliyati, korporativ sirlar va sud jarayonlari ma’lumotlari kabi nozik ma’lumotlarni o‘z ichiga olgan ma’lumotlar bazalariga maksimal darajada kirish huquqini so‘rashgan.

Ruxsat berilgandan so‘ng, agentlik vakillari shubhali chiquvchi trafikni qayd etdilar, bu esa ma’lumotlarni nusxalash yoki uzatish mumkinligi haqidagi xavotirlarni keltirib chiqardi.

Vaziyatni DOGE xodimlari xavfsizlik tizimida o‘z harakatlarini qayd etmaslikni so‘ragani, keyin esa izlarni yashirishga uringani - monitoring vositalarini o‘chirib qo‘ygani va kirish jurnallarini qo‘lda o‘chirib tashlagani yanada og‘irlashtirdi.

Hodisa allaqachon AQSh Kongressiga ma’lum qilingan. Bu masala bilan, ehtimol, FQB shug‘ullanadi. Shu bilan birga, Maskka nisbatan Rossiya tuzilmalari bilan ehtimoliy aloqalar haqidagi savollar tobora ko‘proq yangramoqda.