Eronning yadroviy doktrinasi o‘zgarmaydi

Eron tashqi ishlar vaziri Abbos Aroqchi mamlakatning yadroviy qurol ishlab chiqishga qarshi rasmiy pozisiyasi jiddiy o‘zgarmasligini bildirdi. Bu haqda u Al Jazeeraga bergan intervyusida aytdi.

Uning ta’kidlashicha, yangi oliy rahbar bu masala bo‘yicha hali ochiq bayonot bermagan, shuning uchun uning qarashlari noma’lumligicha qolmoqda.

Sobiq oliy rahbar, AQSh va Isroilning Eronga qarshi urushi boshida halok bo‘lgan Ali Xomanaiy, avval ommaviy qirg‘in qurollarini yaratishga qarshi chiqqan edi. 2000-yillar boshida u bunday ishlanmalarni taqiqlovchi fatvo chiqargan.

G‘arb davlatlari, jumladan AQSh va Isroil, ko‘p yillar davomida Tehronni yadroviy qurol yaratishga intilishda ayblab kelmoqda, bu fatvo va rasmiy pozisiyaga qaramay. Eron rasmiylari esa o‘z yadroviy dasturi faqat tinch maqsadlarga qaratilganini ta’kidlaydi.

Avvalroq Eron parlamenti MAGATE bilan aloqalarni ma’lum shartlar bajarilguncha to‘xtatish to‘g‘risidagi qonunni ma’qullagan edi. Bu shartlar orasida yadroviy ob’ektlar va olimlar xavfsizligi bo‘yicha kafolatlar ham bor.

Prezident Mas’ud Pezeshkian hamkorlikni to‘xtatishga farmon bergan, tashqi ishlar vaziri Abbos Aroqchi esa MAGATE rahbari Rafael Grossining bombardimon qilingan ob’ektlarga tashrif buyurish so‘rovini rad etgan.

Eronda agentlik pozisiyasi «siyosiy motivlarga ega» deb hisoblanmoqda — ayniqsa 12 iyunda qabul qilingan rezolyusiyadan so‘ng, unda Tehron majburiyatlarni bajarmaslikda ayblangan. Bu rezolyusiya Isroil aviahujumlari boshlanishidan bir kun oldin qabul qilingan edi.

Vashington Tehron harakatlarini «qabul qilib bo‘lmas» deb atab, yana bir bor keskinlikni oshirmaslikka chaqirdi. Tehron esa o‘z navbatida, yadroviy dasturi faqat tinch maqsadlarga qaratilganini ta’kidlab kelmoqda.