Litva Belarus AESi ishini to‘xtatishni so‘ramoqda

Litva atom energetikasi xavfsizligi davlat inspeksiyasi Belarus AES birinchi va ikkinchi bloklari faoliyatini to‘xtatishni so‘rab murojaat etgan.

Inspeksiya Belarus tomonidan ikkinchi blokning sovutish reaktori konturi organik moddalar bilan, birinchi energoblokning sirkulyasion konturi esa radionuklidlar bilan ifloslangani to‘g‘risidagi xabarlarni tushuntirishni talab etmoqda.

Shuningdek, reaktor korpusi mahkamlangani, aniqlangan defektlar va tugallanmagan ishlar bo‘yicha izohlar so‘ralgan.

Inspeksiya avvalroq AES uchun tanlangan joyning seysmik va yirik aviakatastrofa oqibatlari bo‘yicha tavsiya etilgan stress-testlar va xavfsizlikni baholash bo‘yicha qo‘yilgan savollarga ham javob olmagan.

Eslatib o‘tamiz, Belarusda AES qurilishidan boshlab uning maqsadi iqtisodiy emas, siyosiy ekanligi yashirilmagan. Ya’ni Belarus AESi orqali boltiqbo‘yi davlatlari, ayniqsa Litvani energetik qaramlikda ushlab turish maqsadi bo‘lgan.

Elektr energiya generasiyasining alternativalardan yuqori tannarxiga qaramay, AES qurilishi uchun Rossiyadan olingan kredit hech qachon qaytarilmasligini bila turib, Belarus shu AESni qurishga Kreml tarafidan majbur qilingan. Birinchi energoblok ishga tushganidan buyon yarim muddat vaqtini remontda o‘tkazgan, ikkinchi energoblok loyihada belgilanganidan qariyb ikki yil kechikib 2023 yil 13 may kuni ishga tushirilgan.