Kundalik hayotda eng zarur bo‘lgan huquqiy bilimlarni mustaqil o‘rgatish bo‘yicha mobil ilova yaratiladi

Joriy yilning 24 sentyabrida Adliya vazirligi mas’ullari ishtirokida aholining huquqiy ongi va huquqiy madaniyatini yuksaltirish borasida qilinayotgan ishlar va kelgusidagi rejalar bo‘yicha matbuot anjumani tashkil qilindi.

Matbuot anjumanida ta’kidlanishicha o‘tgan davr mobaynida adliya organlari tomonidan jami 370 mingdan ortiq targ‘ibot tadbirlari o‘tkazildi. Shundan 40 mingdan ortiq televideniye, radio, gazeta va jurnallarda chiqishlar qilindi, 92 mingga yaqin ma’lumotlar veb-sahifalar va ijtimoiy tarmoqlar orqali, 223 mingdan ortiq seminar va manzilli targ‘ibot tadbirlari tashkil qilindi hamda 15 mingga yaqin ko‘rgazmali huquqiy targ‘ibot materiallari aholiga tarqatildi.

Huquqiy axborotlarni yetkazish raqamlashtirildi. Barcha qonunchilik hujjatlarini Yagona huquqiy axborot almashish tizimi orqali davlat organlari va tashkilotlarga, mahallalarga yetkazish yo‘lga qo‘yildi.

Yagona axborot tizimi orqali barcha davlat organlari va tashkilotlariga 288 ta normativ-huquqiy hujjat matnlari hamda 9 455 ta mahallalarga 124 ta qonunchilik hujjatlari va ular bo‘yicha huquqiy targ‘ibot materiallari to‘plami yetkazib berildi.

Mahallalarda 8 029 marotaba «Huquqiy targ‘ibot kuni» o‘tkazilib, 218 953 marotaba huquqiy targ‘ibot tadbirlari tashkil etildi, 224 721 ta huquqiy targ‘ibot materiallari tarqatildi.

«Mamlakat kelajagi – qonunga itoatkor va huquqbuzarlikka toqatsiz yoshlar bilan» g‘oyasi asosida 13 549 marotaba yoshlar bilan huquqiy targ‘ibot tadbirlari o‘tkazildi.

«Huquqiy bilimlar oyligi» doirasida 230 ta maktablar, liseylar va texnikumlarda seminar-treninglar o‘tkazildi.

Aholining huquqiy madaniyatini oshirishga qaratilgan 5 ta huquqiy aksiyalar o‘tkazildi.

Joriy yilning 18 sentyabrida «2024-2025 yillarda jamiyatda huquqiy madaniyatni yuksaltirish bo‘yicha chora-tadbirlar dasturini tasdiqlash to‘g‘risida»gi Hukumat Qarori qabul qilindi.

Mazkur qaror bilan 95 ta banddan iborat quyidagi yo‘nalishlar bo‘yicha dastur tasdiqlandi.

shaxs, davlat va jamiyatning o‘zaro munosabatlarida aholining huquqiy madaniyatini yuksaltirish;

jamiyatda huquqiy madaniyatni yuksaltirishda huquqiy targ‘ibotning innovasion usullarini joriy qilish;

aholining huquqiy madaniyatini yuksaltirishda ommaviy axborot vositalarining rolini kuchaytirish;

huquqiy madaniyatni yuksaltirishning ilmiy asoslarini tadqiq etish.

Dastur ijrosi doirasida kelgusida quyidagi bir qator katta loyihalarni amalga oshirish rejalashtirilgan:

– o‘quvchilar va talabalar o‘rtasida korrupsiyaga qarshi murosasizlik tuyg‘usini shakllantirishga qaratilgan insholar tanlovi o‘tkaziladi;

– maktablarda «Huquq olamiga sayohat» o‘quv dasturlarini joriy etiladi;

– maktablarda zamonaviy ko‘rgazmali o‘qitish vositalari bilan ta’minlangan «Huquq sinflari» bosqichma-bosqich tashkil etiladi;

– davlat xizmatchilari o‘rtasida «Huquqiy zakovat» intellektual o‘yini o‘tkaziladi;

– chekka va olis hududlarda yashovchi xotin-qizlar uchun «Ayollarga huquqiy madad» qo‘llanmasi bepul tarqatiladi;

– an’anaviy umummilliy Konstitusiya imtihoni o‘tkaziladi;

– aholining barcha qatlamlari uchun mo‘ljallangan, kundalik hayotda eng zarur bo‘lgan huquqiy bilimlarni mustaqil o‘rgatish bo‘yicha mobil ilova yaratiladi;

– «Advice.uz» huquqiy axborot portalidan 24/7 rejimida foydalanish imkoniyatini yaratish maqsadida portalga sun’iy intellekt tizimini joriy etish choralari ko‘riladi;

– «Davlat va huquq asoslari» fanidan elektron resurslar, jumladan, elektron darsliklar, o‘quv-metodik majmualar, videodarslarni tayyorlash va ulardan masofaviy ta’lim jarayonida samarali foydalanishni yo‘lga quyiladi.