Keskin tanqidlar! Krishtianu Ronaldu: "Kamol Soydere rolini men o‘ynasam bo‘lmasmidi?" (foto)

Daryo nashri hafta o‘rtasida ijtimoiy tarmoqdagi eng ko‘p muhokamaga sababbo‘lgan, mashhur postlarni o‘rtoqlashdi.

Seriallarga ishqibozlik necha yuz ming dollarga tushdi?

O‘zbek internet tarmog‘ida shu kunlardagi eng muhokamali mavzu, bu eski kasallik, shou-biznes mavzusi bo‘ldi. Toshkentga qaysidir sabab bilan kelgan turk aktyori Burak O‘zchivitning kelishidan ko‘ra boyvachcha xonimlar unga sarflangan bir necha yuz ming dollar ko‘proq bahs keltirib chiqardi. Buni eshitgan tarmoq foydalanuvchilaridan ayrimlari hayratga tushdi, ayrimlari isrofdan nafratlandi. U bilan suratga tushgan ayollar haqida salbiy fikrlar bildirdilar. Ulardan ayrimlarini keltiramiz.

Dima Qayum

Turk aktyori 400 ming dollarga yaqin pul ishlab olibdi bizdan

Onkologik shifoxonadagi bolalar

Yuragi porok bo‘lgan go‘daklar

Nochor oilalar

Beva-bechoralar

Qariyalar

Nogironlar

Bor edi.

Uyalinglar!!!

* * *

Xurshid Habib

#choyichish

2002 yili Yaponiya va Janubiy Koreyada bo‘lib o‘tgan jahon chempionatidan keyin yapon qizlari guruh-guruh bo‘lib turk futbolchisi Ilxan Mansizni yoqtirib qolishgan va Mansiz Yaponiyaga bir necha marta choy ichgani borgan. Shu ma’noda choy ichish faqat bizning ayollarimizning kamchiligi emas. Yarashmagan tomoni o‘rtacha (toza) oylik 100 150 dollar atrofida bo‘lgan mamlakatda pulni maza-bemaza narsaga sarflanganidir. Undan ko‘ra shu pullar Dima Qayumning xayriya ishlarga berilsa yaxshi bo‘lmasmidi?

Uvoli tutsin.

* * *

Barno Sultanova

Hayotda puldan ham qimmat turadigan sotilmas, sotib olib bo‘lmaydigan narsalar bor. Bu or, bu g‘urur. Turk aktyori uchun to‘langan pul hisob-kitobini qilmoqchi emasman. O‘sha birgina reklama uchun turk aktyorini chaqirganimiz uchun uning oyog‘iga poyandoz bo‘lganimiz uchun hayratlanasan kishi. Or uchun tashlashmaymizmi, g‘urur uchun talashmaymizmi? Achinarlisi, qizlarning uni o‘rab olib suratga tushgani, yanayam xunugi, ovqat yeyotgan aktyorning peshonasiga borib olib talashib-tortishib suratga tushgani. Qancha surat ko‘rgan bo‘lsam, atrofida yosh-yosh qizlar. Faxr bilan suratga tushyapti. Eng odamni ijirg‘antiradigani, uni ovqat yeyishga ham qo‘ymayotgani, eng kulgilisi, aktyorning o‘zi xo‘rlangandek shumshayib o‘tirgani, turgani. Bu nima, bilasizmi? U hayratda, ayollarimizning yuzsizligidan, sirti madaniyatli ko‘ringani bilan, ichki madaniyati yo‘qligidan hayratda!!! Ba’zi ayollarning Turkiyada yomon nomi chiqib kelayotgani ham hech kimga sir emas. Buni ishsizlikka, pulsizlikka yo‘ymang. Inson g‘ururi, ori bilan hayvondan farq qiladi. Hamma och qolayotgan, pulsiz yashayotgan ayollar o‘zini sotaversa, andisha, hayo, ibo degan tushunchalarni lug‘atdan o‘chirib tashlashga to‘g‘ri keladi. Mana shu turk aktyorini chaqirib falon pulni beqadr qilib sochib tashlashimizning o‘zi bizda g‘urur, or yo‘qligidan darak. Suratlariga, videolariga qarasangiz, o‘zini juda noqulay his qilayotgani ko‘rinib turibdi. Agar salgina jilmaysa, quchog‘iga kirib ketishidan qo‘rqqandir sho‘rlik. Sizlar uchun, shunday ayollar borligi uchun u uyalib ketgandir. Shahrimiz chiroyli, mehmonxonalarimiz dahshatdir. Xizmat ko‘rsatishga gap yo‘q. Ovqatlari falon pul. Ammo aktyorni bir lahza ham tinch qo‘ymagan, ovqatining ustiga chiqib olgan qizlar, ayollar xuddi ibtidoiy jamoada yashayotgandek tasavvur uyg‘otadi odamda. Xuddi aktyor jungliga borib qolganu, qabiladagi odamlar chetdan kelgan sayyohlarga og‘zini ochib qarab qolgandek tasavvur uyg‘otadi odamda.

* * *

Troll Football UZ

Ma’lumot o‘rnida, jahonning eng ko‘p maosh oluvchi futbolchisi Lionel Messi kuniga 296 400 yevro, undan keyingi o‘rindagi Krishtianu Ronaldu esa 24 soat ichida 167 850 yevro mablag‘ topadi.

* * *

Hamza Jumayev

Pulku mayli, xotin-qizlarimizning ori, g‘ururi ham Burakjon poyiga tushibdi... Hoy erkak ! Xotining, opang, singling, qizingni yig‘ishtirolmasang, senga Vatanni ishonib bo‘lmaydi!

* * *

Shuhratbek Samo

Burak Turkiyaga borgach, xotini Faxriyaga O‘zbekistondan ne nozaninlar atrofimda girdikapalak bo‘lishdi, ammo men... , desa ham ajab emas. Ammoning uyog‘ini yoza olmayman. Nima bo‘lgani menga qorong‘u. Agar Burak O‘zchivit odobli inson bo‘lsa, o‘zbek qizlarining bu qilig‘i haqida gapirmasa kerak. Ishqilib shunday bo‘lsin.

 

Muzaffar Abdurahimov

Bu kecha anovi Kemal bilan nonushta qilganlarning erlari o‘zlarin eng baxtli odam deb o‘ylashsa kerak, chunki xotinlari bugun ularni Kemalim deb chaqirishadi.

* * *

Muhammad Temur A’zam

Buroq otni boqish ancha qimmat ekaney.

* * *

Mavzuga doir eng original izohlar uchligi.