Kitob sevuvchilar uchun 10 maslahat

1.  Barmoqlarni ho‘llab kitob o‘qishga odatlanmang. Birinchidan, madaniyatsizlik, bu kitobxonga yarashmaydi. Ikkinchidan, kitobingizni sizdan avval shu tarzda o‘qigan yoki endi o‘qishi mumkin… (Madaniyat o‘qilgan kitoblar soni emas, tushunilgan kitoblar sonidir)

2.  Kitobni bukmasdan o‘qing – hali bu kitobni oila a’zolaringiz ham o‘qishi lozim.

3. Oq varoqli kitob ko‘ngilni ko‘taradi, ammo ko‘zingizni tez charchatadi, izlab ko‘ring boshqa nashriyot shu kitobni sariq qog‘ozda chiqargan bo‘lishi mumkin.

4. Katta, og‘ir kitoblar tik holda saqlansa kitob varoqlari muqovadan ajrab ketadi, bu holat katta kitoblar uzoq muddat tik holda saqlangandan keyin yuz beradi. Buning oldini olishning yo‘llaridan biri kitoblar ostiga qalin folga solib qo‘yish.

 5. Sotib olayotgan kitobingizni qattiq muqovada bo‘lishiga e’tibor bering, qattiq muqovadagi kitoblar uzoq yashaydi. Yumshoq muqovadagi kitobni boshqa nashriyotda qattiq muqovada chiqarilgan varianti ham bo‘lishi mumkinligini unutmang!

6. Kitobingizni hech qachon quyoshda qoldirmang!

Quyoshda qolgan kitobni suvi qochadi va yirtiluvchan bo‘lib qoladi. Ustiga ustak yostiqday bo‘lib shishib ketadi. Ishonmasangiz, vaqtingizni o‘g‘irlagan biror kitobda sinab ko‘rishingiz mumkin.

7.  Kitob do‘konidagi biror kitob yoqmasa, chiqib ketishga shoshilmang, har bir kitobchining topilmalar sandig‘i bo‘ladi. Uni ochishga majbur qiling!

8.  Ko‘pchilik kitob o‘qisam, uyqum keladi deyishadi. Kitobdan uzoqlashishning oqibati shu, ham aql ham jism uyquga ketadi. Kitob o‘qiganda uyqu kelishi doimiy kitob o‘qishga odatlanilganda o‘z o‘zidan yo‘qolib ketadi… Ammo kitobxonga aylanguningizgacha sizga yordam beradigan  bir necha tavsiyalar ham bor. Birinchi: Uyqu  kelishi boshlanganda kitobni baland ovoz chiqarib o‘qiy boshlang. Ikkinchi: Uyqu kela boshlaganda joyingizni o‘zgartiring, biroz dam oling.

9.   Kitoblarni o‘qish jarayonida sizda paydo bo‘lgan fikrlarni yozib boring. Zero yozuvchilar shu tarzda paydo bo‘ladi. Bu ish sizga o‘qigan kitoblaringizni yodda saqlashga ham yordam beradi. Unutmangki o‘qigan har bir qatoringiz miyangizda qoladi va qachonlardir sizga beminnat xizmat qiladi.

10.   So‘zim oxirida aytmoqchimanki, SIZ LAHZALARDAN IBORATSIZ! Har bir oningizni abadiyatga muhrlang! Kelajagingizga sarmoya bo‘la oladigan kitoblarni o‘qing!

Yuqoridagilarni yozarkanman hayolimga kitoblarimni buklab, tagiga chizib o‘qiydigan do‘stlarim keldi. Kitob parashyutga o‘xshaydi, ochilmasa foyda bermaydi! Men bir kitobsevar inson sifatida o‘zim kabi kitobsevar kitobxonlarga ba’zi tavsiyalarni bermoqchi bo‘ldim holos, aziz do‘stim qanday o‘qisangiz ham o‘qisangiz bas!