JSST: Mobil telefondan foydalanish miya saratoniga olib kelmaydi
Jahon sog‘liqni saqlash tashkiloti topshirig‘iga binoan avstraliyalik olimlar tomonidan uyali telefondan foydalanish va miya saratoni xavfi o‘rtasida bog‘liqlik bor-yo‘qligiga oid tadqiqot natijalari e’lon qilindi, deb xabar bermoqda Reuters.
Tadqiqotda 1994 yildan 2022 yilgacha dunyoning o‘nta davlatidan to‘plangan, mobil telefondan foydalanish va miya saratoni xavfi o‘rtasida bog‘liqlik bor-yo‘qligi haqidagi ma’lumotlar tahlil qilindi. Mobil aloqaning dastlabki kunlarida ko‘plab mutaxassislar uyali telefonlarni boshga yaqin joyda tez-tez ishlatish miya saratoniga olib kelishi mumkinligidan qo‘rqishgan. Shu sababli, mobil telefon ishlab chiqaruvchilari har bir aniq telefon modelining radio emissiya darajasini o‘lchab, nashr etdilar va bu haqda iste’molchilarga maxsus bukletlarda xabar berishdi.
Biroq, Avstraliya Radiasiyadan himoya qilish va Yadro xavfsizligi boshqarmasi (ARPANSA) tomonidan e’lon qilingan topilmalar mobil telefondan foydalanish va miya saratoni o‘rtasida hech qanday bog‘liqlik aniqlamadi.
Topilmalarga asoslanib, tadqiqotchilarning ta’kidlashicha, miya saratoni bilan kasallanishning umumiy darajasi tadqiqot va ma’lumotlar yig‘ish davomida barqaror bo‘lib, vaqt o‘tishi bilan hech qanday tebranishlarni ko‘rsatmadi, chunki iste’molchilar mobil telefonlardan tobora ko‘proq foydalanmoqda.
1993 yildan 2022 yilgacha qayd etilgan miya shishi holatlarining ko‘payishi diagnostika usullarining rivojlanishi, shuningdek, MRI tadqiqotlarining keng tarqalishi bilan bog‘liq. Topilmalar shuni ta’kidlaydiki, «uyali telefondan foydalanish 2003 yildan beri keskin oshgan bo‘lsada, bu davrda miya saratoni ko‘paymagan». Shuningdek, 2003 yildan beri suhbat paytida mobil telefon eng yaqin bo‘lgan temporal loblar sohasida kasalliklar sonining ko‘payishi kuzatilmadi.
