Irlandiya yoqilg‘i solig‘ini 505 million yevroga kamaytirdi

Irlandiya hukumati mamlakatda portlar, yo‘llar va yoqilg‘i infratuzilmasini ishdan chiqargan norozilik namoyishlari fonida 505 million yevrodan ortiq qiymatdagi avtomobil yoqilg‘isi solig‘ini kamaytirishini ma’lum qildi. Qarorni Irlandiya Bosh vaziri Mixol Martin e’lon qildi, deb xabar beradi Report.

Xabarga ko‘ra, bayonot polisiya Goluey va Foyns portlarida, shuningdek, O’Konnell-strit ko‘chasida (Dublin shahar markazi) norozilik namoyishlarini tarqatib yuborganidan bir necha soat o‘tgach, e’lon qilindi. Traktorlar va yuk mashinalari hafta boshidan beri bu hududlarda transport harakatini to‘sib qo‘ygan.

Bundan tashqari, bir kun oldin huquqni muhofaza qilish organlari harbiylarning ko‘magida Uaytgeyt neftni qayta ishlash zavodi (Kork grafligi) yaqinidagi blokadani olib tashladilar. Bu mamlakatdagi yagona neftni qayta ishlash zavodi.

Bosh vazir ushbu chora-tadbirlar to‘plamini namoyishchilarga imtiyoz sifatida ko‘rmaslik kerakligini aytdi. Uning ta’kidlashicha, qaror rasmiy transport va fermerlar tashkilotlari bilan birgalikda qabul qilingan va rasmiylar "saylanmagan" norozilik rahbarlari bilan to‘g‘ridan-to‘g‘ri muzokara olib bormaydi.

Shuningdek, so‘nggi haftadagi tartibsizliklar Irlandiyada yoqilg‘i ta’minoti zanjiriga jiddiy zarar yetkazgani ta’kidlandi.