Hindistonliklar Bobur haqida kino suratga oldi
![Hindistonliklar Bobur haqida kino suratga oldi Hindistonliklar Bobur haqida kino suratga oldi](/photos/news/tXwaJcxauiX4Dyv.jpeg)
«Yash Raj Films» kino studiyasi tomonidan suratga olinayotgan «Bobur – Mo‘g‘ul imperatori» tarixiy-badiiy filmining tizeri namoyish etildi. Film rejissyori Nitish Tivari, prodyuser Karan Johar.
Shohruh Xon, Amitabh Bachchan, Ajay Devgan, Ayshvarya Ray, Navazuddin Siddiqiy va Randip Xuda kabi aktyorlar ishtirokidagi ushbu film Mo‘g‘ul davridagi ijtimoiy hayot, davr voqeliklari haqida hikoya qiladi.
Suratga olish ishlari 2022 yilda boshlangan. Filmning premyera sanasi hali e’lon qilinmagan, biroq 2024 yilda chiqishi kutilmoqda. Kino tanqidchilar filmda Bobur hayoti va saltanatini to‘g‘ri ochib berilganini qayd etgan.
Tarixdan bizga ma’lumki, Zahiriddin Muhammad Bobur ona tomonidan mo‘g‘ul qavmiga mansub va bu haqda olimlar orasida turli-tuman fikr-mulohazalar mavjud.
Bobur ota tomonidan temuriylar sulolasiga mansub. U otasi Umar Shayx avlodi haqida «Boburnoma» asarida quyidagicha yozadi: «Sulton Abusaid Mirzoning to‘rtunchi o‘g‘li edi… Sulton Abusaid mirzo Sulton Muhammad mirzoning o‘g‘li edi. Sulton Muhammad mirzo Mironshoh mirzoning o‘g‘li edi. Mironshoh mirzo Temurbekning uchinchi o‘g‘li edi».
Onasining avlodi haqida esa «Qutlug‘ Nigorxonim edi, Yunusxonning ikkinchi qizi, Sulton Mahmudxon, Sulton Ahmadxonning egachisi edi. Yunusxon Chingizxonning ikkinchi o‘g‘li Chig‘atoyxonning naslidindur», deyiladi. Shunga ko‘ra, Bobur Qutlug‘ Nigorxonimning to‘ng‘ich o‘g‘li yoki Chingizxonning ham nabirasi hisoblangan.
Milliy kinematografiyani rivojlantirish markazi Axborot xizmati