G‘arb havo mudofaasi Rossiya raketalarini qaytara oladimi?

NATOning raketaga qarshi mudofaa tizimlari Rossiyaning «Oreshnik» o‘rta masofaga mo‘ljallangan ballistik raketasi uchirilganini aniqlashga qodir, biroq ularning uni tutib olish samaradorligi shubhaliligicha qolmoqda. Bunday bahoni Fransiyaning Le Monde gazetasi Fransiya Aerokosmik kuchlarining yuqori martabali zobitlarining so‘zlariga tayanib bergan.

«[Ukrainaning] ittifoqchilarining ogohlantirish tizimlari bu turdagi tahdidni aniqlashi mumkin, ammo bu uning zararsizlanishini kafolatlamaydi. Javob choralarini ko‘rish uchun bor-yo‘g‘i 30 daqiqa vaqt bor», — dedi nashrning ismini oshkor etmagan suhbatdoshi.

Raketa uchirilgandan so‘ng uning yadroviy kallak bilan jihozlangan yoki yo‘qligini aniqlash ham mumkin emas. «Oreshnik» - bu RS-26 «Rubej» tizimining rus ballistik raketasining o‘zgartirilgan versiyasi, parvoz masofasi 6 ming km gacha. U 3-4 tagacha yadro kallaklarini olib yurishga qodir.

Fransiya harbiy rahbarining fikricha, Rossiya tomonidan o‘rta masofaga uchuvchi «Oreshnik» raketasidan foydalanish AQShning Donald Tramp boshchiligidagi yangi ma’muriyati bilan mumkin bo‘lgan muzokaralar uchun savdo vositasi sifatida qaralishi kerak. «Ruslar o‘zlarining qat’iyatlarini namoyish etish uchun kuch pozisiyasini egallashga harakat qilmoqdalar», dedi Le Monde manbasi.

21 noyabr kuni Rossiya prezidenti Vladimir Putin Dneprdagi Ukrainaning «Yujmash» zavodiga zarba berish uchun Rossiya yadroviy bo‘lmagan «Oreshnik» raketasidan foydalanganini aytdi. Bu qadam Ukrainaning Bryansk va Kursk viloyatlaridagi Rossiya nishonlariga hujum qilish uchun Amerika va Britaniya raketalaridan foydalanishiga javob bo‘ldi.

Putinning ta’kidlashicha, Rossiya-Ukraina mojarosini qo‘zg‘atgan G‘arb siyosati «jiddiy oqibatlarga olib kelishi mumkin». Rossiya prezidenti 21 noyabr kuni kechqurun xalqqa murojaatida shunday dedi: «Biz AQShning Yevropa va Osiyo-Tinch okeani mintaqasida joylashtirish rejalariga javoban o‘rta va qisqa masofali raketalarni ishlab chiqmoqdamiz».

G‘arb tahlilchilariga ko‘ra, yadroviy salohiyatga ega «Oreshnik» raketasining uchirilishi Kiyev va uning ittifoqdoshlarini qo‘rqitish uchun qilingan. Raketa faqat oddiy jangovar kallaklarni olib yurgan bo‘lsada, uning xarakteristikalari - gipertovush tezligi va kallaklarni ajratish qobiliyati - tutib olishni deyarli imkonsiz qiladi, deya xulosa qiladi Le Monde.