Galataport - MAPIC 2023 mukofotlari doirasida “Eng yaxshi yangi taraqqiyot loyihasi” sifatida tanlandi

Galataport Istanbul, Fransiyaning Kann shahrida bo‘lib o‘tgan MAPIC 2023 taqdirlash marosimida maxsus mukofotga loyiq deb topildi. “Eng yaxshi yangi taraqqiyot loyihasi” nominasiyasida birinchi o‘rinni egallagan Galataport Istanbul, yangi texnologiyalar bilan jihozlangan zamonaviy binolari, tashrif buyuruvchilar sonini oshirishga qaratilgan arxitektura xususiyatlari va boshqa bir qancha afzalliklari bilan e’tirofga loyiq ko‘rildi.

Istanbulda ko‘rishingiz zarur bo‘lgan joylaridan biri hisoblangan Karako‘yning sayyohlar uchun ko‘plab takliflari bo‘lib, u yerda hashamatli turar joy va mehmonxonalar, turli xarid markazlari hamda hashamatli restoranlardan to zamonaviy san’at markazlarigacha bo‘lgan barcha imkoniyatlar mavjud. Karako‘y markazida joylashgan Istanbulning kruiz porti - Galataport, MAPIC 2023 taqdirlash marosimida dunyo bo‘ylab “Eng yaxshi yangi taraqqiyot loyihasi” mukofotiga sazovor bo‘ldi. Ushbu e’tirof bilan Galataport va Karako‘y shaharning yangi diqqatga sazovor joylari sifatida obro‘sini oshirdi.

Galataport Istanbul o‘z mehmonlariga o‘zgacha tajriba taqdim etadigan mahalliy va xalqaro brendlarning aralashmasiga ega. U boy gastronomiya markazi sifatida ajralib turadi. Uning 40%i taomlanish uchun mo‘ljallangan kafe va restoranlardan iborat. Bu yerda nafaqat Turkiyaning eng muhim chakana savdo guruhlari va investorlar, balki yirik xalqaro brendlari ham bor.

Karako‘y - Bosfor manzarasi bilan g‘ayrioddiy kashfiyot

Galata ko‘prigi yaqinida va xuddi shu nomdagi minora ostida joylashgan Karako‘y, Oltin shox (Halich) qirg‘oqlaridan Bosforga qadar cho‘zilgan hududni qamrab oladi. Istanbulning eng qadimiy va tarixiy tumanlaridan biri hamda yirik savdo va transport markazi bo‘lgan Karako‘y bugungi kunda an’anaviy va me’moriy mahalla xususiyatlarini taklif qilgan holda sayohat qilish uchun gullab-yashnayotgan “issiq nuqta”dir.

Agar siz Galaportga keluvchi kruiz yo‘lovchisi bo‘lsangiz, Karako‘y qirg‘og‘ida sizni ajoyib Bosfor manzarasi kutib oladi. Istanbulning mashhur Galata ko‘prigi bo‘ylab piyoda o‘tish, Karako‘y port hududiga borishning eng yaxshi yo‘llaridan biri sanaladi. Istanbulning tarixiy portini jonli gastronomiya, madaniyat, san’at va savdo hududiga aylantirgan Galataport, bundan tashqari, Istanbulning eng mashhur ikkita muzeyiga mezbonlik qiladi.

Turkiyaning birinchi zamonaviy san’at muzeyi Istanbul Modern, Galataport Istanbul hududida joylashgan. Pritzker mukofoti sovrindori arxitektor Renzo Piano binoni Bosforning jo‘shqin suvlaridan va yorug‘lik akslaridan ilhomlanib loyihalashtirgan. Istanbul Modernda xalqaro va mahalliy san’atkorlarning turli yo‘nalishlarda ijod qilgan asarlari namoyish etilmoqda. Muzey shuningdek, doimiy va vaqtinchalik ko‘rgazma maydonlarida jahon darajasidagi zamonaviy san’at ko‘rgazmalariga mezbonlik qiladi.

Turkiyaning birinchi plastik san’at muzeyi bo‘lgan Istanbul rasm va haykaltaroshlik muzeyi ham xuddi shu tumanda joylashgan. Muzey XIX asrning oxiri Usmonli imperiyasidan XX asr oxirigacha bo‘lgan turk san’ati tarixining muhim ma’lumotlarini taqdim etadi. Muzey kolleksiyasida 10 497 ta rasm, 719 haykal, 257 kulolchilik, 182 xattotlik, 10 ta piktogramma va bitta instalyasiya mavjud.